1 RAMPAUBE de ketwa peu lo, pa au yi lu,

nah pe samsang samkak au kelungta bamla.

2 RAMPAUBE anuide kelikebeu sam teu rang lo,

pane ngauraume ba gade keli kelume pelane.

3 Pa nnuide sangme deu gwale ngngwa ngkwa luda,

naimiak kepetle nah naimiak kenlütle gade,

nreule nah ngkangle de.✝

4 Penui hetaideu lampui kegah ga raw ladi

nah lungh kera namdi kette ngaulu tadi.

5 Penui mzeu nah hereu kedi ziemne,

penui nnei cangsiak eh kau zeudi.

6 Ge penui rei gade RAMPAUBE de qu gai,

nah pa penui rei gade penuide kelilu.

7 Pa penuide lampui kemzui be sau lia

iciu eh penui namdi ga gwang eh lungh lu kerane.

8 Oh minadung pe samkakkelu samsang de ziemne RAMPAUBE de twa maisia

nah pa mina ziemne miswa kega bata tei kegaidung ziemne.

9 Pa hereu kelame de peu sak set lula

nah kenzeume de ketyeipok keyi le pui lula.*

10 Mina kangge pesui sia delwe kemui ga bam,

hebaangme keupwa keherei bam.

11 Kedanemene penui kengkieng Tinggwang samdung de renia kedine

nah Hutube Tinggwang rang kebeudung de gileu kedine.

12 Pa penuilung tei henah lu peu penuide keherei kegai gade;

penui kaudi, nah migede penuide ngha kera gah.

13 Ciciu ge penui keherei eh RAMPAUBE de qu gai,

nah pa penui rei gade penuide keli lu.

14 Pa penuide penui lungrei nah kemui gade ngngwa mpetlu

nah penui kangriadung de teitüt kecai di.

15 Oh minadung pe samsang samkak de ziemne RAMPAUBE de twa maisia,

nah pa mina ziemne miswa kega bata tei kegaidung ziemne!

16 Pa hetah geu hebaangki heriekidung teipang

nah hegeulwadung teicum dida.

17 Penui au kemieme, samzai tei kemak gade,

nah penui maudung ziemne penui keherei bam.

18 Penui matyei neu tadi,

nah penui ketsai kirie taiga gwangdi.

19 Ge penui rei gade RAMPAUBE de qu gai,

nah pa penui rei gade penuide kelilu.

20 Pa pesam kaibeu eh penuide tei hemilu,

nah penui rau gade penuide kelibeu.✝

21 Oh minadung pe samsang samkak de ziemne RAMPAUBE de twa maisia,

nah pa mina ziemne miswakegah bata tei kegaidung ziemne!

22 Peu penui ratak teipwa pecu hetwa peu maisia,

nah penui sui keyi lei gade pa tei kegai leune ndu maisia.

23 Mina kangge jaaidi gade liem taugwang

delwe jaaidi gade penui pok hi tyei.

24 Cidungde RAMPAUBE teilu kebuibe ngau

nah duidi reuga pe miswakegah batadung.

25 Kedanemene pa aja kaigai nah tingkai kaidi gui cu di

duide cuidung guinlai di.

26 Penui liemdung de tingkai ga pung cehu cudi; nah kecuk gage teinliem di

kengngi cikenzwa gade minadung penui kekuu gahdi.

27 Penui tanglia dedi sakmie kelume ge nzwa

nah penui kecet de kemtadi.

28 Ge penui rei gade RAMPAUBE de qu gai,

nah pa penui rei gade penuide keli lu.

29 Pa tingkai kaici de kaam dige

nah duicui zing dedi.

30 Duidi cui zing de kedine penui sui yi di,

nah pa penuide penui neu kebam liemtau bam ga ngngwa gwanglu.

31 Oh minadung samkakkelu samsang de ziemne RAMPAUBE de twalu maisia,

nah minadung ziemne pa miswakegah batadung teigai!

32 Penui mina kangbau kecu gade pe kemdu peu ranglo

nah kecingme baudi gade pecu twa lo.

33 RAMPAUBE hereukidung de hetaideu tei di

dui rwakdung de kecang deu tei di,

34 nah pa tangnia keyi deu de pwa hangdeu ketsai ge teidi,

kedanemene pe minadung kenlien ziemne.

35 Pa hetaideu de pwa rejaaidung tei di,

nah kecang deu de pwa dui rwakdung ge teidi.

36 Pa mina kemzeume de peu cika lunghlu,

nah penui lungh kera namdi ge tei lu.

37 Penui namdi heta taa kera tei lu, kubebangdung linglu

nah luhlüt mmi süt lu.

38 RAMPAUBE penuide samlambeu cine penui kiee süt lu.

Pa penui kaunedung de peu cam dima.

39 Penuide mine ngaurau nah hengam teidi

keteei nah kehereine.

40 RAMPAUBE ngauraume muiteumedung de tei hengam tei gaila

nah penuide peu hetaideu lampui kegah ga rwa ladi.

41 Dede pa kegame de penui lungrei gade kelilu

nah penui kilungme de pe meurün hau nzwa pie rengei beu.

42 Ma kesangme aide ngau eh penui sui yi lu,

nah kenlienme pelane de peu zing dedi.

43 Peu ningcing kecume de aidung de cet lulo,

nah peu RAMPAUBE bata samkakkelu samsang de nsung bammui lulo.