1 N kesamsang hezaidung hegwangpei de peulu, Tinggwang,

n kesamsang hegwang napei dage.

2 Peu pecu kesangbe gade kemzuibe teu n minadung tutiaklu kera

nah magah kecume dage de kemzuibe teu eh.

3 Peu n lamlwadung minadung ziemne kezuyi peulu;

peu kideutudung kesamsang peulu.

4 Peu pecu kegahme tutiak teune lu;

pecu peu teumai kesiame de ngha lu

nah penuide ngaurau kelame de nkap dilu.*

5 Peu penuide ncu rütlu tingnaimiak kebam dau,

nah ceheudung pelane ga hekei bam kecu tiege.

6 Peu tingrui nzwa nghunglo cehei hedi pwa kebam ga,

kideube ga tingrui kegai nzwa.

7 Peu makesangme de pe tingbaziedung gade lungh yilu,

nah peu cika hekei gah di kemakta lungh keyile kepui teilu.

8 Peu pecu jaaidi reu jaaidi kengkieng teulu,

nah hereuki gade kideube penli ga kecang.

9 Peu hetaideu ga lungh kebamme pe dwaga keumie lu;

peu pe ngauraume de rebui mniak lu.

10 Peu Tarshish gwangpeidung nah duigwadeudung pecu mta mapeu zie;

peu Sheba nah Seba gu gwangpeidung mapeudung pwapeu lu.

11 Kesang, peu hegwangdung pelane pe dwaga kaumie lu;

peu heleuh pelane pe gwa teilu.

12 Kedanemene pa teumai kesia hap eh kebamme de ngha la

nah kegahme penui de ngha kera bam kemakme.

13 Pa kegahme nah teumai kesiame de ngaunggia la,

nah pa teumai kesiame teilung kelibeu la.

14 Pa keherei nah kerigi kecu gade penui teilungh keli beu,

nah pe miakngau gade penui jai au pemihung.*

15 Peu pecu ringlu! Peu Sheba kecak de pecu peulu.

Peu minadung de pe ziemne kekie teila muilu;

peu Tinggwang de pecu tingbazie pelane samlam beulu.

16 Peu hangdeu cika meibui ne kepui teilu;

lamlwa tudung ga peu penui meibang de mlai bamlu.

Peu petsi de Lebanon nzwa lu;

luh ga cehei lungh yi kebam nzwa eh peu minadung de namdidung gade lungh yilu.

17 Peu pe zi de kelungta bammui lu;

peu pe zi de tingnaimiak kebamtane bamlu;

peu pe dade minadung da samlam bamlu;

peu heleuhdung pelane pecu samlam kepungbe de eh qulu.

18 Peu RAMPAUBE Tinggwang, Israel Tinggwang, da samlam bamlo,

pa rünne miswakegah tadung tei kelabe.*

19 Peu pe zi kemdu de ga kelungta samlam bamlo,

nah peu hangdeu pelane ga pe zi kemdu de pui lo.

Amen nah Amen.

20 Jesse napei David kekiedung cang dida.