1 Ih a lung tie eh RAMPAUBE de kwa;

pa a kwa siulu nah a kehap de kingneilu.

2 Pa hekwa kecok kengngi gade acu teu mpetlu, nyiasai gade acu teumpet lu,

nah pa a pi tsura gage kaibeu nah a pidau de peu kwaklu.

3 RAMPAUBE a mui gage lei keheci ge kaibeu, anui Tinggwang de twa.

Mi kekiee ge cide ngau zie nah pecu herüt peulu

nah RAMPAUBE de nlum luzie.

4 RAMPAUBE de nlum kelame samlam pungtu

nah ngang kelame de mede pe dade nreutetdi eh kenretbedung da nreu gai kedime de rütla kemakme.

5 RAMPAUBE a Tinggwang, miswakegah n batadung nang teikegaidung de au kekiee ge,

nah anui ziemne n lungcetdung de au pei canggai lak;

Ih rang ndu gai nah cidungde ranggai liecai,

cidungde au peilu kebui swade kiee zie.

6 Nang au ratak mede reca tei kegai luuneu mah,

dede nang a kwendung ngkei beu;

nang keru ratakdung mede kemau recadung nsui lamah.

7 Ge Ih ranggai, "Pielo, Ih gwang bam da;

kerau laisiudum gage a ha rau pwabam.

8 Ih n lungning ketei ga a suiyi bam, a Tinggwang;

a nlung ga n zaidung kai pwabam."*

9 Ih mina maadi ga n kesamsang samlia keyide rang ndu liagai dida;

RAMPAUBO, Ih aide tei kecu ga a mleu mtak di kemak nang cibam.

10 N kesamsang de Ih a lung gage hebai dimah;

Ih n samsang nah nang ri kebeu de Ih rang mduilia gai da;

N mina maadi dade Ih n samkakkelu samsang de mede ncu nlumlukebui de kebai dima.*

11 N ngaugia tadung de a da gwang cangta kedi tei diso, RAMPAUBO;

n samkakkelu samsang nah ncu nlumlukebui dene peu acu gum kwaklu.

12 Pei kapgai kelak kehereidung de ne acu twagwa pungbam;

a kesiadung ne acu gumlu iciu eh Ih ma ngau sita dida;

cidungde a peu ga a tamleidung swade kiee,

nah a lung kekuu gah da.

13 N sui yilu, RAMPAUBO, acu kelilu kerane;

mzet gwang acu ngha lo, RAMPAUBO.

14 Acu zui eh acu teitset zie lie he kelame de

peu hengam ngaulu nah ngngai dilu.

Acu tei rezam kegai ga penui sui kelame de,

peu nreucaili dilu nah peu ngngam dilu.

15 Penui de penui hengam de ziemne peu penui swagah dilu,

a dage, "Aha, aha!" De kelame de.

16 Dede ncu peei kelame depeu penui sui yilu nah n dage penui sui yisütlu;

peu n kelikelu de ku kelame leude,

"RAMPAUBE de twalu," de rangmui lu.

17 Ih au kegahme nah ma gah;

iciude Rampaube acu nsungla.

Nang a kenghabe nah acu kelibeu kera gwang;

acu nghabeu kera ridi helo, a Tinggwang.