1 RAMPAUBE de hetwa peulu, kedanemene pa yi kecune,

pe samkakkelu samsang kelungta la kecune.

2 Israel mina depeu,

"Pe samkakkelu samsang kelungta la," de eh peu ranglu.

3 Aaron leuhme depeu,

"Pe samkakkelu samsang kelungta la," de eh peu ranglu.

4 RAMPAUBE mie hing kelame de peu rang dailu caisuime de peu masanglu,

"Pe keku samsang au kelungta la," de eh peu ranglu.

5 Ih rei kela gade Ih RAMPAUBE de qugai;

RAMPAUBE a sam keligai nah acu kelibeu.

6 RAMPAUBE a da la; Ih ngngi dilak;

mina ne acu dai tei lulai?*

7 RAMPAUBE acu ngha la nah a taiga la;

Acu ngaurau kelame de Ih ngamkelu ngau zie.

8 RAMPAUBE da nsiu kelube yiki

mina de kenlum swa.

9 RAMPAUBE da nsiu kelu be au yiki

kengkiengmedung de kenlum swade.

10 Heleuh leune acu twagwa pungbam;

RAMPAUBE zi gade Ih penuide ngkap dizie.

11 Penui acu twagwalu; yeo, penui acu twagwalu;

RAMPAUBE zi gade Ih penuide ngkap dizie.

12 Tegeinedung nzwa penui acu twagwalu;

penui hetubangdung ga mi gah zette di kela nzwa gah dila;

RAMPAUBE zi gade Ih penuide ngkap dizie.

13 Penui acu tei nkau di kerane acu renia,

dede RAMPAUBE acu ngha beu.

14 RAMPAUBE a kengkieng nah a suiyi,

nah pane acu kelibeu kelabe.

15 Ngkieng kelu suiyi kwadung kesamsangme paikidung ga siu bam dida;

RAMPAUBE zetle ba ngkinglu da.

16 RAMPAUBE zetle ba de hetwa pwa peu bam;

RAMPAUBE zetle ba ngkinglu da.

17 Ih tsai dilak, dede ring luzie

nah RAMPAUBE tadung de mdu lia zie.

18 RAMPAUBE acu saja peu msiasüt gai;

dede pa acu ketsai ba gage kai dima.*

19 Kesamsang kirieki acu let beulo;

Ih cika lüt eh RAMPAUBE de hetwa peu zie.

20 Aide RAMPAUBE kirieki da;

kesamsangme cikade nlüt zie.✝

21 Ih ncu hetwa peu zie, kedanemene nang a kekie teibeu kecu ziemne,

nah nang a kelikelube dide kecu ziemne.

22 Tangtsu ta keteime tangtsu kemta lie de gi kedi tangtsu de

kimiak tangtsu teidi.*

23 Aide RAMPAUBE ne teigai;

aide anui miak dwa gade miswakegah ta ge.

24 Aipau benai RAMPAUBE pe bata teigai;

anui renga zie nah aika anui sui yizie.

25 Ngaungia eh, RAMPAUBO, anuide kengkieng peulo!

Ngaungia eh, RAMPAUBO, anuide yi kelu peulo!

26 RAMPAUBE zi gade kegwangbe ne samlam pungtu;

RAMPAUBE ki gade anui nnuide samlam beula.*

27 RAMPAUBE au Tinggwang, nah pa anuide kebaa peu da;

ratak tei kegai de heria le kang eh recabam kiidung gage kang ncütlu.

28 Nang au a Tinggwang, nah Ih ncu hetwa pwa peuzie;

nang au a Tinggwang; Ih ncu hetwa peu zie.

29 Oh, RAMPAUBE de hetwa peulo; kedanemene pa yi kecune;

pe samkakkelu samsang kelungta la kecune.