1 Tinggwang de rünne Ih zingde eh kwabam;

a kelikelu au pe dade gwang.

2 Pa rünne agu tangtsu nah acu kelikelube;

pa au agu tsukwa kehube; Ih madaude ngamdi lak.

3 Dai tiege, nnui pelane, mina ge de ketang zie no,

ciu eh nang pecu cwadi lu kerane

kengngei tangdeu mede mlak kebam hegurieta ge nzwa?

4 Penui pe dade pa hetwakepeu heni gade teu nghungdi kera rünsangne peda resiu gai;

penui kenretdung rang neu la;

penui muidung gade au penui pecu samlam beu, dede penui mlungdung gade au penui pecu reset gai. Selah

5 Tinggwang de rünne Ih zingde eh kwabam;

a keregui pe dage kaipwa kebam ziemne.

6 Pa rünne agu tangtsu nah acu kelikelube;

pa au agu tsukwa kehube; Ih madaude ngamdi dilak.

7 A kelikelu nah a kendu au Tinggwang da bam;

Tinggwang acu gum kela kengkieng be nah a kemsiube.

8 Peting pelane Tinggwang de nlum bamlu, nnui minadung;

pe dwa gage n nlung de sau gailu;

Tinggwang au anuide kegumbe. Selah

9 Mipeidung pelane de kenretla, nah mipeidung kedime de nah keceume de kemta;

kemdetdung gade penui au mcala dizie;

ngngwa mdet ncütle, penui au ngicui ge swade perüt mcaki.

10 Mide teikeherei mede kerega de nlum so;

nah maheidung de suisam tei eh keregui bam so,

kedanemene penui petsi bui lak; n nlung penui da kai pwabam diso.*

11 Tinggwang piage ranggai,

Ih aide piana siuda:

kengkieng au Tinggwang da bam.

12 Ncu de liede, Rampaube, samkak kelu kesamsangbe la,

kedanemene penui tei kegai nzüt gade nang mina pelane ziehi tei beula.*