1 Tinggwang, nlei mene bam diso! Anui de püt diso nah mtak bam diso, Tinggwang.

2 Pielo, n ngauraume au kehebwak kaibam dida, nah ncu ngau keraume penui peudung ngang cuh bam dida.

3 Penui kenkiem ciem tei eh n minadung de mmau la nah ncütlwe heciem riem la nang gum kelume de mmau kerane.

4 Penui kakgade rangdi, "Gwanglu, nah anui penui leuh tei ngkap digo. Iciude Israel zi nsungtadilu kerane."

5 Penui ncütlwe teigwang kera mariem ket riemlu; penui ngngwa zangna teilu ncu mmau kera,

6 Edom cuikui paikidung nah Ishmaelme, Moabme nah Hagritme.

7 Gebal, Ammon, Amalek; nah Philistiame de si eh nah Tyre namdi ga lungh kebamme.

8 Assyriame de si eh penui de ncütlu;

penui reutak nia ge teilu Lot leuhme ziemne. Selah

9 Penui dage teigai lo nang Midiame* dage teikegai nzwa,

nang Kishon reu gade Sisera nah Jabin dage tei kegai nzwa.

10 Penui Endor gade kap ga dida

nah kideu be mania lungyi kera deige nzwa tei dida.*

11 Penui kedime dage Oreb nah Zeeb da tei kegai nzwa tei gai lo,

nah penui hegwangna medung pelane dage Zebah nah Zalmunna da tei kegai nzwa tei gailo.

12 Penui ranggai, "Ko anui katei

Tinggwang deu keyi de luulu go."

13 A Tinggwang, penui de tingkainrui rebui nzwa teu nrui dilo,

reigau tingkai ne gui gidi kela nzwa,

14 mi hegung ru di kela nzwa,

nah miheu lamlwatu dung ru di kela nzwa.

15 Penui de gwalo n kengkieng tingkai le,

nah penui de keheu lo n rahang tingkai le.

16 Penui zu dung hengam le peu pui lu

iciu eh penui nzi peei lubui, RAMPAUBO.

17 Penuide hengam gage kai beu di lu nah kelungta keheu la dilo;

penuide peu hengam le pung tsaitim gah dilo.

18 Iciude penui cilu zie nang rünne, RAMPAUBE,

kideu pelane reu Hutube Tinggwang lie kecu.