1 Ih twa kela Tinggwang, nlei mene bam diso,

2 Kedanemene kenlienme nah mide kecwame acu tei;

penui a ha kenretpe rang.

3 Penui a cu twagwa lwe ngau kerau samdung rang la,

nah penui acu pekie kegah gade acu tei la.✝

4 Ih penuide ku la liede penui a cu ngaurau,

dede Ih penui ziemne kekie tei bamla.

5 Penui makeyi ziemne acu kesia peu dai la,

nah penui a keku de ngaurau la.

6 A ngauraume tutiak kera tutiak kemau aidungde kenzwa gede kedet lulo;

pe ngauraume gede pe lamsap kerane kedet lu.

7 Pecu tiak kecudau, peu pecu maudi lulo;

peu pe kekie de kemauge di lu.

8 Peu pe teilung zie cam dilu;

peu kedame gede pe bata tei dilu.✝

9 Peu pe namedungde de nggiane tei dilu,

nah peu pe nau de hemipui ge tei dilu.

10 Peu pe namedung de hui eh haketeime tei dilu,

penui ki kau kedi de gidi eh penui ma hala.

11 Pa mipaupung kelamedung de peu pema pelane keuteu dilu;

peu sangmedung de pa tei kelu pelane luteu dilu.

12 Peu mige dede pe dade pezai yi so;

peu mige dede pe name nggiane de ngau nggia so.

13 Peu pe namedung de gah dilu;

peu penui zidung gwang kela ceheu de nsungta dilu.

14 Peu pe paumedung maudung de RAMPAUBE de ci lo; nah peu pe pui mau de madaude nsungta helo.

15 Peu penui mau RAMPAUBE dwaga lamui lu;

peu RAMPAUBE de kideu ga penuide nsungtazing dilu kera tei lu.

16 Peu RAMPAUBE de aide teilu kedanemene aipau mina de madaude pe samkakkelu samsang de keulia kera cet lama,

dede meliene mide tei keherei nah daptsetla, lungh gailak kelame de, kegame de,

nah pe ngha kegame de.

17 Pa mide reset neu la; peu cide pe da cailigwang dai lulo.

Pa mide samlam raula; peu samlam kette pe da gwang so.

18 Pa reset le pecu cum teu lala pe paini nzwa,

nah pe resetdung de dui nzwa pepum ga zui lüt lulo,

pe ra ga maca nzwa.

19 Peu pe resetdung pa paini teu kela nzwa pecu gumlu,

kiakang pa pecu kangteu lamui kela nzwa.

20 Peu aide RAMPAUBE dade kegwang acu ngaurau kelamedung gu ziehi lulo,

acu kemmau samdung kerangmedung de.

21 RAMPAUBE a Rampaube, n zi gade nang acu ngha beu lo.

Kedanemene n samkakkelu samsang de au yi kecune, acu keli beu lo.

22 Ih maga nah kengha gah kecune,

nah a nlung ga rezam pwa bam dida.

23 Ih tinghegi tingkaumie ge nzwa gah di lai auda;

acu tangrim nage nzwa kecung mpet dida.

24 A ngkokpuikena mnei dida mmwang kecu gade;

Ih a geu nah a ra swa si meda.

25 Acu mmau kelame acu mapei meda;

penui acu ngau ge, penui peungum dila.*

26 Acu ngha lo, RAMPAUBO a Tinggwang;

acu keli beulo n samkakkelu samsang de le.

27 Peu penuide aide n bata lie kecu ci lulo,

nang, RAMPAUBE, ne teigai lie kecu.

28 Penui acu reset liede, nang acu samlam beu bilo;

penui acu tei kecudau, peu penuide ngam dilu,

dede peu n kilabe de pe suiyi lulo.*

29 Peu a ngauraumedung de hengamle cum lulo;

penuide peu penui ngam pai nzwa bah lulo.

30 Ih amui le RAMPAUBE de ketwa kedi sahbak eh peu zie.

Ih pe minadung ngkwa gade pecu twa zie.

31 Kedanemene RAMPAUBE kegahbe lam gum beuzie,

pecu mmau kelamedung dade kelibeu kerane.