1 Ih n dage, RAMPAUBO, nsiu gaila;

madaude peu acu hengam tei diso

N kesamsang le acu kelibeu lo.

2 A kwa siu gailo; acu kelibeu zette lo;

a kensiu tsurabe ge lulo,

acu kelibeu kera kemsiu bam ge.*

3 Kedanemene nang au akensiube nah acu kegumbe;

ciziemne n zi ziemne, a mapie nah acu teuswa beulo.

4 Penui hebaih a ziemne hebai pwa kebam gade acu teu mpet beulo,

kedanemene nang a kemsiube kecune.

5 N ba gage Ih rabe kaibeu la;

nang acu kelibeu zie, RAMPAUBO, makesang Tinggwang.*

6 Kemta miedung reca kelame de Ih ngkaula,

dede Ih RAMPAUBE de nlum.*

7 N samkakkelu samsang ga Ih a sui yi nah sui yisüt lazie,

kedanemene nang a rei ngau de kecune;

nang a rabe keherei kecu cibam.

8 Nang a ngauraume ba gage acu kaidi ma.

Nang a pi heni kemza gage kaibeu.

9 Acu ngaunggia gailo, RAMPAUBO, kedanemene Ih keherei kelane;

a rabe nah a pumteih ga lungrei kebam ngau eh a miak leu dida.

10 A suisiet le a teilung leu dida

nah kencam le a mmidung leu dida.

A mau ziemne a kengkieng mnei dida,

nah a radung tuii eh gahdi zeuda.

11 A ngauraume pelane ziemne, mina acu ngau ngkau dida;

a kidacaina acu pie eh penui swagah dida,

nah acu ci kebamme hingsüt dida.

Lampuiki ga acu kengaume a dade pak mdei dila.

12 Acu au ketsaime ge de mina nsung la kemak nzwa nsungta dida.

Ih au kepang li ge nzwa dida.

13 Kedanemene Ih mi kekiee ge ngkim kempau kebam Ih siu da,

kengngi samdung tu leune gade

penui a da makesia teigai kera riem bam.

Penui a teilung keuteu di kera riem bam dida.

14 Dede Ih ncu nlum, RAMPAUBO;

Ih rangla, "Nang a Tinggwang."

15 A tingdung au n ba ga bam.

A ngauraume nah acu gwa zui kelame ba gade acu kelibeu lo.

16 N kilabe reu gage n zu le tau baa beulo;

n samkakkelu samsang le acu kelibeu lo.

17 Acu peu hengam tei di helo, RAMPAUBO; kedanemene Ih n dage qugai lalu!

Peu kesiame de hengam tei dilu! Peu penuide Sheol gade zingde bam dilu.

18 Kenret kela mleudung de peu zingde dilu

kesamsangme de rang renia kelade

ngang eh nah rangmsia kelade.*

19 N keyi daihiage de dino

ncu rüt kelame ziemne hekwa pwa kebamde,

n da nsiu kelame dage liabeu kelade

mina leune dage!

20 Nang penui da la eh penuide kebai beula, mina ciemdung gade.

Nang penuide gum teuna beula penui ngauraume penuide rang kemsia gade kensiu ni keyi gage kai beula.

21 RAMPAUBE depeu samlam punglu,

kedanemene namdi ga acu a ngauraume twagwa kebam gade pa acu pe keyi kedi samkakkelu samsang de lia kecune.

22 Ih mzet delwe,

"N miakngau gade acu gwagi dida," de eh rangdi liede

nang a nggia kwa siubeu

Ih n dage mra kegai dau.

23 RAMPAUBE de kulu, samsang kela leune.

Samsang kelame de RAMPAUBE gum beula,

dede ngang kelame de penui ziehi teicang siak beula.*

24 Ngkieng lu nah kuu lu,

RAMPAUBE de nlum eh kengha kie kela leune.*