1 Hutube Tinggwang msiu ga lungh kebambe au

Ngkiengtube miekang ga bamzie.

2 Ih RAMPAUBE ha rangzie, "Pa a kemsiube nah acu kegumbe,

a Tinggwang, Ih nlumla kelabe."

3 Kedanemene pa ncu rehume ba gade kelibeu zie

nah rapia siasüt kecu gade.

4 Pa pe hesiudung ne ncu gum beuzie,

nah pe hesiudung kangga nang msiu kera ngau luzie.

Pe masang au kegumbe nah kemsiube.

5 Nang tingmui kengngi gede hing dilak,

mede tingkebaa dau lakpitsi lim kela gede,

6 mede tingkemui ga terwa twagwa kebam rapia de de,

mede tingna tingdau mateei kegwang de de.

7 Cang ge n lambie kaumie tsaidi lubui

nah cang kerei ge n ba zetle,

dede cide n da gwang canglak.

8 Nang pie kegai rünne zie

nah kesiaketeime de saja kepeu ngauzie.

9 Kedanemene RAMPAUBE au a kemsiube!

N kemsiube de liede Hutube Tinggwang tei lulo.

10 Herakesia gede n dwa rai gailak;

kehebwak kette n ki taiga gwang nna lak.

11 Kedanemene pa pe samgwame de langpwa ncu gum beuzie,

n lampui leune ga ncu gumbeu kerane.

12 Penui ba le penui ncu pwacuh zie

ciu eh nang n pi tangtsu gage ketaudi melu kerane.*

13 Nang hinghodung nah heneidung de n pi kangga ge dau pang gaizie;

nang hinghodung kehenabe nah heneidung de daucim zie.

14 Pa acu nlumla mui kecu ziemne, Ih pecu kelibeu zie.

Ih pecu gum beuzie kedanemene pa au ada masang.

15 Tinggwang rangla, Ih keherei tingdau pe da lazie;

Ih pecu ngkiengkelu peuzie nah pecu kerüt peuzie.

16 Ih pe teilungketie le pwa pe mnung tei beuzie,

nah pecu a kelikelu keulia zie.