1 Kesiame ziemne ncu keradi helo;

kemau bata tei kelame de hengim so.

2 Kedanemene penui au kidi kela nzwa eh zette kidi zie

nah cehei kendiak bangdung nzwa regui dizie.

3 RAMPAUBE de nlumlu nah makeyi teilu;

kideube *ga lungh lu nah samsang eh kwaklu.

4 RAMPAUBE gade nnui sui yilu,

iciulude pa nnui nlung luneudung nnuide peuzie.*

5 N teilung Tinggwang de peulu;

pecu nlumlu, iciulude pa n mding tei eh heta tei beuzie.

6 Pa n masang de tei mbaa pwa ting kebaa de nzwa tei beuzie

nah n kemzui zai de tingna tingba nzwa tei beuzie.

7 RAMPAUBE dwa ga ziune bamlu nah nnui lung tie eh pecu kwalu.

Mikangge penui ta ketei ga teidau kegaidau nnui rata di helo,

mede pa makemaudung riem kegaidau.

8 Nnui rata so nah liagai kelak teiso.

Nnui lung keherei so. Aide au keherei rünne peula.

9 Kemau ta tei kelame de gwagi dizie,

dede RAMPAUBE de kwa kebamme kideube gum luzie.

10 Peting tie mene kesiame pei de gah kedidau;

nang pe bam ga pie zie, dede pa bamlak.

11 Dede kenciepme kideube gum luzie

nah teilung keyi kelung ga penui sui yilu zie.*

12 Kemaube pei kesamsangme de tei keherei kera riem bamla

nah pa pecu pe rata eh geigim bamla.

13 Rampaube pecu nui bamla,

kedanemene pa pe tutiak tingba gwangkelade ngau kebamne.

14 Kesiame penui gu kingtiedung keumpet luda nah penui lakpi ga luda

keherei kelame de nah kegahme de ngkap di kerane,

keyi tei kelame de daptset dizie.

15 Penui kingtiedung le penui katei penui nlung kui zie,

nah penui lakpidung cum dizie.

16 Makesangme ma kecamnage kebambe au

kesiame mahei pelane swa yiki.

17 Kedanemene kesiame badung au cum dizie,

dede kesamsangme de RAMPAUBE ngha la.

18 Tingnaige cai tingnaige RAMPAUBE mau kemakme mapie bamla,

nah penui mapwa kelungta bamzie.

19 Penui peting kesiadau ngngam dilak.

Herakum gwang liede, penui tyei maisia kieege bam zie.

20 Dede kemaume kapdi zie.

RAMPAUBE ngauraume cehei kemdu nzwa zie;

penuide ngkap dizie nah mika nzwa gah dizie.

21 Kesiame ma hepokla dede peudai lama,

dede kesamsangme au pe zaiyi nah ma peula.

22 Tinggwang ne samlam kebeume kideube gum luzie;

pane reset beu kedime de au gwagi dizie.

23 RAMPAUBE pe samzai tei kelame lampui sau beula,

Tinggwang penui teilung pelane ga pesui la.

24 Pa pe pi ma nrapgai liede, pa kaudilak,

kedanemene RAMPAUBE pa pe ba le pecu tuipwa kebamne.

25 Ih piage hena bam nah cu au hecing dida;

Kesamsangme de gi kedi madauge de Ih ngau ma,

mede pe namedung maha tyei la eh.

26 Tingba ramsangne pa au pe zai yi nah ma peula,

nah pe namedung au samlam ge dila.

27 Kemau ketei gade nreudilu nah petaube teilu;

iciu lucai nang kelungta kwak eh bam luzie.

28 Kedanemene RAMPAUBE keyibe pesui lalu

nah pe dade samsang kelame de gi dila melu.

Penui kelungta kwak bam lula,

dede kesiame namedung de gi dizie.

29 Kesamsangme kideube de gum luzie

nah cika kelungta lungla dizie.

30 Kesamsangme mui le macisam rangla

nah kemzuibe tei nkiee lula.

31 Pa pe Tinggwang sam pe nlung gage kaiteu lala;

pe pi reneu dilak.

32 Kesiame kesamsangme de pieling eh bamla

nah pecu daptset kera peei bamla.

33 RAMPAUBE pecu kemaube ba gage kaibeu dilak

mede pe tuketiak dau pecu mmau dilak.

34 RAMPAUBE de kwalu nah pe sam mzailu,

iciulu de pa ncu teucuh lu eh peu ncu kideube de gum luzie.

Nang kemaume de gwagi kedi ngau zie.

35 Pe deu ga tsingbang kendiakpe ge nzwa lungh zangra kebam

Ih kesiame nah ngau kehingme de ngau da.

36 Dede Ih tetkahgwang daige, pa cika bam ma.

Ih pecu peei, dede pecu peeilu tadi.*

37 Keyime de mcetlu, nah makesangme de peilu;

helung kenciepme pei ge ziemne gwangdai kezeu teilung keyi ge bam.*

38 Kemaume de ngkap ciak dizie;

kemaume caineu gwang kera ngkap dida.

39 Kesamsangme da kelikelu au RAMPAUBE dade gwangla;

keherei kecudau penuide pa gum beula.

40 RAMPAUBE penuide ngha la nah kelilu la.

Pa penuide kemaume dade keli beula nah gum beula

kedanemene penui pe dage nsiu kebamne.