1 RAMPAUBE de twalu!

RAMPAUBE de ketwa peulo, pa au yi kecune;

pe samkakkelu samsang de au kelungta bam muila.

2 Cauge RAMPAUBE bata kedidung pelane peikap lulai no

mede ketwa peulu kebui batadung rang cang lulai no?

3 Pesam mzai kelame samlam pungtu,

nah bata keyibe rünne teimui kelame.

4 Acu nsung gailo, RAMPAUBO, nang n minadung de ngha kecudau;

nang penuide kelibeu kecudau acu de ngha lo.

5 Ciciu cai Ih nang kedet kelume ngking kelu de ngaulu zie,

n leuhme penui sui keyi

nah nangne pwa kepeu maleu teu ketwa kepeu de.

6 Anui paumedung nzwa anui mau dida;

anui petau kemak tei dida nah anui makesia tei dida

7 Egypt ga anui paumedung Tinggwang bata miswakegah kedidung de ci lumah;

nang pia kekieege penuide keku keu keliadung de penui nsung tadi;

penui Jaaidi Kegie gade kengkingbe de renia di.

8 Dede pa penui de kelibeu, pe sampet kebeu nzwa,

iciu eh pe kengkieng kedi de keulia kerane.

9 Pa Jaaidi Kegie de de kesiugai, ge cide canghdi.

Delwe pa penuide kecok cika de hetaideu gage ngngwa mpetlu.

10 Pa penuide ngkau kelame ba gade penuide kelibeu,

nah pa penuide ngauraumedung dade kelibeu.✝

11 Dede dui ne penui ngauraume de kegak teudi;

penui mige de ringlu mah.

12 Ciciu ge pe minadung pe samdung nlumlu,

nah ketwa lei tei pecu twa.

13 Dede penui pa tei kegai de nsungta zette di;

penui pe keledeudung de kwa tadi.

14 Hetaideu gade penui hengim le kepui teigwang

nah penui hangdeu ketsai gade Tinggwang kedei di.*

15 Cine pa penui kie kecube peu,

dede penui dage ngau kehing mateei langgai.

16 Ramzeuki gade penui Moses

nah Aaron de ngau penui riakdi, RAMPAUBE kemci cingkupei de de.

17 Kideu ngkei gai eh Dathan de mnwa lu

nah Abiram nah pe caisuime de gumcim di.*

18 Penui kakga mi cakmie;

mi le kesia kenlienme de ru di.

19 Penui Horeb* deutu gade hetumseu ge hegeu keyidung le teilu

nah cipau miede de reca.*

20 Penui hetum cehei tyei kelabe mie ge pwa

Tinggwang kemdu de rehiak lu.✝

21 Penui Tinggwang penuide kelikelube de nsung tadi,

Egypt ga bata kedi leu tei kegaibe de.

22 Pa Ham deu gade miswakegah tei gai

nah Jaaidi Kegie gade pe kengkieng kedi bata keulia.

23 Tinggwang pe minadung de ngkapti zielie kerang dau,

pane kedetkelu kilabe, Moses, pe dwa sapkap lwe

penuide ngkap di kera pe rata de kaam di meni.

24 Pecai penui kideu keyi de gidi,

penui Tinggwang sampet nlum kemakne,

25 dede penui paikidung gade bam eh ncam di,

nah RAMPAUBE samzai tei tadi.

26 Cine pa peba hwacuh penuide sam kai eh

peu penuide hetaideu gade tsai dizie lie kecu,

27 penui namedung de heleuh kedadung kakgage tei zangra di zie lie,

nah penuide peu sangme deu gade peu lungzang dizie lie eh.✝

28 Pecai Peor gade, penui minadung Baal* de kereca ga ncüt lu,

nah keringria kega rabedung de ratak tei kebeudung de tyei.

29 Penui penui bata le RAMPAUBE rata teidi,

nah mateei ngau kehingge penui kakga de petdi.

30 Ge Phinehas cuh lwe kemaume de saja peu,

ge mateei de gahdi.*

31 Pecu au samsang lie de eh

ceheu pelane ga kelungta rangla di.

32 Meribah duilet gade penui RAMPAUBE rata teidi,

nah Moses penui ziemne kehereidi.*

33 Penui Moses suisiet teisüt di,

nah pa macet mene ma rang zette di.

34 Penui heleube de tei msia dima,

RAMPAUBE penuide rangkebeu nzwa,

35 dede penui heleuh kedadung de ngngwa lungh ncüt

nah penui zaidung keteu lu

36 nah penui mamiedung de reca di,

aide penui ziemne hebaih ge di.

37 Penui penui napei nah penui napuidung de pwa herakesiadung de ratak teibeu.*

38 Penui kemau kegahme de teitset,

penui napei nah penui napui dungde,

penui canaan gu mamiedung de ratak tei beu,

dapketsetme ne hangdeu be tei hera dida.

39 Penui penui bata le penuide tei hera dida;

penui ta au helipuidung ge nzwa di.

40 Cine RAMPAUBE pe minadung de perata di

nah pa pekatei pe minadungde pesui tadi.

41 Pa penuide heleuh kedadung ba gage kaibeu di,

nah penui ngauraume ne penui reu kedi teidi.

42 Penuide ngauraume ne tei keherei

nah penui cipaume kang ga lungh ladi.

43 Pia kekieege RAMPAUBE pe minadung de ngha kera gwang,

dede penui renia bamdi,

nah penuikatei penui mau ziemne penuide tei mneidi.

44 Iciu liede, pa penui lungrei ngaulu

pa penui nggia sah kegai kwa siu keludau.

45 Penui dage pa samkak kelude nsunglu,

nah pe keku kedi ziemne pa pelung nciep dai lu.

46 Pa penuide ngam kelume de peu

penuide ngaungia lu.

47 Anuide keli lu, O RAMPAUBO anui Tinggwang.

Anuide heleuh kedadung kakgade ngngwa gwang dai beulo,

iciu eh anui ncu ketwa peu zie nah n zi kemci de twa lu zie.

48 RAMPAUBE de twalu, Israelme Tinggwang de, pecu

cude nah kelungta twalu!

Mina pelane "Amen" de eh rangdi.

RAMPAUBE de twalu!✝