David lei ge.

1 N dage, RAMPAUBO, Ih a teilung kaibeu la!

2 A Tinggwang, Ih ncu nlum.

Acu peu hengam tei diso;

peu a ngauraumedung a reu ngkieng eh penui sui yi diso.

3 N dage keregui kebam mige dade de peu hengam gwang diso,

mide cwa kelame de peu hengam tei dilu!

4 N lampuidung acu lia lo, RAMPAUBO;

n lampuidung acu ledeu beulo.

5 N kesang gage acu saugai beulo nah ledeu beulo,

kedanemene nang acu keli kebeube a Tinggwang kecune;

petingnai Ih n da regui bamla.

6 Nsung gailo, RAMPAUBO, n ngaugia ta nah n samkakkelu samsang;

kedanemene cidungde ndaa de bamdi delu.

7 A rehangdau kemau tei kedidung nah Ih renia kegaidung de nsung helo;

Samkakkelu samsang dele acu nsung gailo n keyi de ziemne, RAMPAUBO!

8 RAMPAUBE au yi nah mzui;

ci ziemne pa kemaume de lampui ledeu lia la.

9 Pa kehename de petau gage saulia gaila

nah pa pe lampui penuide ledeu beula.

10 Pe keku nah pe masang au nli dila ma

RAMPAUBE sam kaikebeu de mzai kelame de pa penuide lampui sau lia lala.*

11 N zi ziemne, RAMPAUBO,

a maugi beulo, kedanemene cide disüt kecune.

12 RAMPAUBE de hing kelabe cauno?

Pa lampui teigai kera ga Rampaube pecu saulia beuzie.

13 Pe teilung au ma keyibe le pui zie;

nah pe dade lungh kegwangme ne hangdeu de gum luzie.

14 RAMPAUBE zangna au pecu herüt peu kelame ziemne,

nah pa pe samkak de penuide peu cilu la.*

15 A miakdung au RAMPAUBE da bammui la,

kedanemene pa a pi baih gade kelibeu zie kecune.✝

16 A da nreu gwanglo nah acu ngaunggia gailo;

kedanemene Ih akatei la nah keherei la kecune.

17 A nlung kehereidung de au dihki dida;

a lungreidung gade acu ngngwa mpet beulo!

18 A lungrei nah keherei kecudung pie gailo;

a maudung leune gi beulo.

19 A ngauraumedung de pie gailo, kedanemene penui au kieesüt kecune;

penui acu ngkautube le acu ngkau la.

20 A teilung gum beulo nah acu keli beulo;

peu acu tei ngngam diso, kedanemene Ih n dage nsiu lalu!

21 A samsang nah a masang depeu acu gumlu,

kedanemene Ih n dade regui kelane.

22 Israel de kelibeu lo, Tinggwang,

penui keherei pelane gade!