1 RAMPAUBO, acu ngkau kelame de ngkaulo;

acu regi kelame de regi lo.

2 N geu keceuna de nah n geu kedi de keu lulo;

cuhlu nah acu ngha lo.

3 Acu gwa zui kelame de n ngei nah n hereu mrew pwa hwalu;

a dage, "Ih n kelikelube da," de eh ranglo.

4 A keringria peei kelame de peu ngngam nah hezi kesia pung dilu.

Acu rezam zie lie riem kelame de peu caili dilu nah kebwak dilu.

5 Penuide peu tsiurie tingkai ne guiteu kelabe nzwa dilu,

RAMPAUBE tinggimgwame penuide zui kegaidau.

6 Penui lampui de peu mui nah reneu dilu,

RAMPAUBE tinggimgwame penuide zui kegaidau.

7 Pekie kegah gade penui a ziemne baih ge mtei pwabam;

pekie kegah gade penui a ziemne makoiki ge kui pwabam.

8 Penui cimezing eh kebamdau kensum kengkap penuida peu gwang dilu.

Penui mtei pwa kebam baih gage penuide keu dilu.

Cikage peu penuide cakmie dilu, penui kengkap gage.

9 Dede Ih au RAMPAUBE da a suila zie

nah acu rikebeu ne Ih a sui yila zie.

10 A kengkieng pelane teu rangzie, "RAMPAUBO, nang kenzwa cau bamno,

keherei kelame de penui swa ngkieng kecume dade keli beu kelabe

nah keregame dade ma kegahme nah keherei kelame de kelibeu kelabe?"

11 Samsang kemak zierangdung cuhbam dida;

kenretpe le penui acu mmau.

12 Penui acu makeyi ge ziemne makesia ge peula.

Ih a suisiet le puibam.

13 Dede, penui nra kebamdau, Ih rosopai bah;*

I penui ziemne a peu keukeimie a kakrak gage kailwe

mmwang la.*

14 A sinabe ziemne au Ih a lung siala;

Ih a pui ziemne au a sui sia eh keumie la

15 Dede Ih kaumie kecudau, ngauraume penui sui yisüt la nah gwang ngkwa lula;

penui gwang ngkwa eh acu mmau la, nah Ih penuide a swagahdi.

Penui acu mtak mene teurak la.

16 Acu rüt mezing eh penui acu keu henui teidi;

penui rata le acu penui geigim lia.*

17 Rampaubo, dai tiege nang piebam laino?

Penui gu tei kengkap tadung gade a rabe keli beulo,

a teilung hinghodung kenzwame dade.

18 Iciulude Ih ncu hemaa maadi gade ncu twa zie;

Ih ncu minadung kekiee kakgade ncu twa zie.

19 Mide cwa kelame a ngauraumedung de peu a reuga penui suiyi diso;

penui mariem kesiadung depeu teidi helo.*

20 Kedanemene penui lungciep teu eh marang la kemakne,

dede anui deu ga ziune lung kebamme de kecwa sam teu eh mmau kera teila la.

21 Penui penui mui ngkei nzalwe acu mmau la;

penui rangla, "Aha, Aha, anui miak le ngauda."

22 Nang ngau da, RAMPAUBO, zingde di helo;

RAMPAUBO, a dade mdei di helo.

23 Nkatei ncu teucuh lulo nah acu gum kera nraklu;

A Tinggwang nah a Rampaubo, a zie rang beulo.

24 Acu gum beulo, RAMPAUBE a Tinggwang, n kesamsang ziemne;

peu penuide a reuga penui suiyi diso.

25 Peu penuide penui nlung gade, "Aha, anui luu keneube luu luda," de eh peu rang diso.

Peu penuide, "Anui pecu ngkap dida," de eh peu rang diso.

26 A reidung ga penui sui kelame depeu hengam tei dilu nah peu kebwak dilu.

Aswa yilie kelame depeu hengam nah hezi kesia le cum dilu.

27 Acu petau liede neu kelamedung de peu suiyi kwa sahlu nah peu penui sui yilu;

peu penuide rangla muilu, "Twalu RAMPAUBE de,

pa pe kilabe teilung keyi lungh kegai ga pe suiyi lala."

28 Pecai Ih n masangbe rangzie

nah Ih tingba pelane Ih ncu twazie.