1 A kekie ngking gailo, Tinggwang;

nah a ngaugia kie kegai gade mbai diso.

2 Acu heling sünne gailo nah acu samkeli lo;

Ih a reidung gade kemtak ga

3 kedanemene a ngauraumedung kwa de ziemne,

kesiame mide ngau kerau kecu ziemne;

kedanemene penui ada keherei teugwang

nah rata gade acu teikeherei.

4 Ada a nlung mbeusütti,

nah ketsai kehing de ada bam dida.

5 Kengngi nah kehing de ada gwang bam dida,

nah mahing kecu ada kepuih teibam dida.

6 Ih ranggai, "Oh, tamhau ge nzwa a hesiu bam liecai!

Ciu cai Ih lim tetdi zie nah mtak dizie.

7 Pielo, ciucai Ih kemdei ga tetrwa la dida. Ih renaamkang ga bamdi zie da. Selah

8 Ih nsiulu kera gage kelwa gai zie

hera tingkai nah kaigui kedi gade."

9 Penui de ngkapti lu, Rampaubo, penui samrang teikellu dilu!

Kedanemene Ih namdibe ga keregi nah ngngwa kesia ngaugai.

10 Penui tingmui tingba tet twagwa kiriedung ga;

kemau nah keherei le tei pui dida.

11 Kehei gade ma tei kemkap bam;

puidikidung au mide teikeherei nah mide kecwa pe lampui.

12 Kedanemene acu kesiu kegaime cide a ngauraume ma,

ciucai Ih punglie lubui;

mede acu ngau rau kelabe a reu gade hegie lalie cai,

ciu cai Ih pe dade mbaidi lubui kerane.

13 Dede cide au nang, Ih siakte mina ge,

a kangngwame nah a zangbe kesangbe.

14 Anui ngngwa kangbau hemisüt lu;

Anui mina kieesüt eh Tinggwang kiga tet nlüt lu.

15 Peu ketsai penui da cimezing eh gwanglo;

penui de peu ringbam eh Sheol ga nghung lo,

kedanemene kesiabe au cipau ga penui lungh bam, penui kakga gapte.

16 A ziemne au, Ih Tinggwang de kengha ziemne quzie,

nah RAMPAUBE acu kelibeu zie.

17 Tinghegi, tingcang nah tingna dau Ih ncam nah mradi;

Tinggwang a kwa siu zie.

18 Acu gwaketang kecu hereu gade pa a teilung de kwak eh kelilu zie,

kedanemene acu gwaketang eh regi kelame au kieesüt.

19 Tinggwang, kelungta hegwang tei kelabe,

penui de siulu zie nah penui de tei ngngam zie. Selah

Penui madaude kedi lama,

nah penui Tinggwang de hing lama.

20 A zangbe pe ba hwacuh pecu ngngwa kezuyi eh kebamme de mmau di;

pa samkak pe da kebamde de herüt peulu ma.

21 Pe samdung au maca nzwa mdui süt,

dede pe nlung au mide nkau süt;

pe samdung au macadui swade mnwa,

ciuliede kesangbe au penui kingtiedung keteume.

22 N reidung RAMPAUBE dage kailu, nah pa ncu teirelui beu zie;

pa kesangme de madaude peu tet ngkoi dilak.*

23 Dede nang, Tinggwang, kesiame de kengkap hekwaki gage keu nghung dizie;

hejai teilwa keneume nah mide kecwa medung au kedame teilung tie pempie de lungh lak,

dede Ih ncu nlum bamzie.