1 A nzeu kekie kingnei gailo, RAMPAUBO; a kengha kie kegai kingnei gailo!

Kecwasam rang kemak muileu gade kepet a kekie kingnei gailo.

2 Teinzeu kelu peu ndade gwanglu; peu n miak de petau be ngaulu!

3 Nang magade a mlung kedakpie eh, tingmuidau nang ada gwangcai,

nang acu teimci beuzie nah kesia mariem ketde ngau lak; a mui kemau tei dilak.

4 Minadung ta ria gade au, n mleu sam ziemne Ih akatei acu hezai mzui la kemakbe lampui gade teu ntsam dida.

5 N lampuidung ga Ih tet ntiprip la;

a pi reneu dima.

6 Ih ncu qula, kedanemene nang a sam keli beu lalu, Tinggwang; a da nreu gwang lo nah Ih marang kegai dau a sam kingnei lo.

7 N samkakkelu samsang de miswakegah ria gade teilia lo, nang n da nsiu kelame de penui ngauraumedung dade kelibeu kelabe!

8 Nang n miak de ku kela nzwa eh acu gum beulo; n hesiu kangga acu hebai gailu

9 mina kesiame acu teikeherei kebam gade, a ngauraume acu twagwa pung kebamme dade.

10 Penui au migede de ngaunggia lama; penui mui ngang kela sam rangla.

11 Penui a pikietdung ga twagwalu. Penui acu tei ngkau di kerane acu pie eh bam.

12 Penui au hingho ge nzwa migede tui kera kwa bam, hingho ge nzwa eh kembai ni ga bwakela nzwa.

13 Cuhlu, RAMPAUBO! Penui de gwa ketang lo! Penui de beu ngkei penui zu gage sam lo! N kingtie le mina kesiame dade a teilung kelibeu lo!

14 N ba le acu mina dade keli beulo, RAMPAUBO, kideube mina aipau teilung rünne ga penui lungh kerelui kebamme dade!

Nang hung kelame de mahei le samlam beulo; penui namedung kieesüt zie nah penui tsame ziemne penui mabam bangnzeu luzie.

15 A ziemne au, kesamsang gade n zu ngau zie; Ih mrak lwe ncu ngau kecudau, Ih mnung luzie.*