1 Ih ncu twazie, a Tinggwang, Hegwangpei;

Ih n zi de samlam zie kelungta.

2 Tingba ramsangne Ih ncu samlam zie;

Ih n zi de twa zie kelungta.

3 RAMPAUBE au di nah pe kedi de twa kerabe;

pe kedi au peicang gailak.

4 N batadung de twazie ceheu ge gade pecai be ceheu nah

n bata kedidung ha rangzie.

5 Ih n kedi kemdu

nah mimakecang n batadung de cetncok zie.

6 Penui nta miswakegah kengkieng de rangzie,

nah Ih n kedi de ndu gaizie.

7 Penui n keyi le kepui de ndu gai zie,

nah penui n masang ha lei tei zie.

8 RAMPAUBE au mide hung nah nggia beula,

pe rata zette lama nah kenlum samkak le kepui teila.

9 RAMPAUBE au pelane dade yi;

pe kenciep ngaugiadung au peta pelane reuga la.

10 Nang tei kelu pelane ncu hetwa peuzie, RAMPAUBO;

ncu kenlumme ncu samlam beuzie.

11 Penui n hegwangram kemdu de rangzie,

nah penui n kengkieng de rangzie.

12 Penui mina dage Tinggwang bata kedi

nah pe hegwang kedi kendu liazie.

13 N hegwang au kelungta hegwang,

nah n kengkieng au ceheudung pelane da lazie.

14 RAMPAUBE kau kelame de ngha la

nah kau kebamme de kwakcuh beula.

15 Ma pelane ncu pie eh kwabam la;

nang penuide ketyeipok peting siakdau peula.

16 Nang n ba ngkeibeu

nah ring kela leune hengim teicang beu la.

17 RAMPAUBE au pe lampui pelane ga masang

nah samsang eh pe ta leune teila.*

18 RAMPAUBE au pecu qu kelame pelane da nna bam,

pecu nlumlukebui gade qu kela pelane da.

19 Pa pecu rüt kelame hengim tei beu la;

pa penui kwa siula nah kelibeu la.

20 RAMPAUBE pecu kekume pelane ma pie bamla,

dede pa kenlienme pelane de ngkap dizie.

21 A mui gade RAMPAUBE de ketwa rangpet zie;

mina pelane de pe kemci zide kelungta samlam kebeube teilo.