1 Anui ncu hetwa peula, Tinggwang;

anui hetwa peu la, nang kebam lia kecu ziemne;

mina n batadung miswa kega de rang la.

2 Riem kenzeu ting ga Ih petau tei eh hetutiak zie.

3 Kideu be nah kelung kau pelane hing eh mbeu dida,

Ih kideu be ciadung tei ntip lulaSelah

4 Ih ngang kelame de rang, "Ngang diso,"

nah kenlienme de, "N kii de pwacu diso.

5 N kii kehudung de gage pwa cuh diso;

kehegie ngwang de teu marang so."

6 Cide naimiak kepetle mede kenlwetle de gwang ma,

nah cide hetaideu gade pwa cuh kecu gwang lama.

7 Dede Tinggwang au tutiak be;

pa teu ngkau nah pwacuh beu kelabe da.

8 RAMPAUBE pe ba ga zau ta kepet piak de pwa kebam de ziemne,

masaladung ncüt kenzeude, nah rui mpet gai.

Kideu ga kenlienme leune zau kamtube kecang de sakbi zie.

9 Dede Ih rang jüja bam zie nang tei kegaide;

Ih ketwa lei tei pwa Jacob Tinggwang de twa zie.

10 Pa rangla, "Ih kenlienme kiidung pelane dang dizie,

dede kesamsangme kii au teucuh beuzie."