1 Ih RAMPAUBE de a nlung pelane le hetwa pwa peu zie;

Ih miswakegah n tadung ha rang zie.

2 Ih n ziemne a suiyi süt eh lei teizie;

Ih n zi de twa eh lei tei zie, Hutube Tinggwang!

3 A ngauraume caili nreu kegwangdau,

penui n dwa gade kau nah kap dizie.

4 Kedanemene nang a zeu de gum beuda;

nang n hegwangbam ga bam, kesamsang tutiakpe!

5 Nang nlumkemak heleuhdung de kesiu;

nang kemaume de ngkap dida;

nang penui zi kelungta nah kelungta ziemne hemai dida.

6 Ngauraume ngkap kedinzwa pangpop dida

nang penui gu namdidung ngkap kedi dau.

Penuide kensunghadung de bam si lakta.

7 Dede RAMPAUBE kelungta hegwang dida;

Pa pe hegwangbam hetu tiak kera mtei luda.

8 Pa kideu de kesamsang le tiak zie

nah Pa heleuhdung ziemne masangbe le tiak beuzie.*

9 RAMPAUBE mine ngau rau kelame ziemne kensiu ge zie,

keherei kecu tingdau kensiu ge.

10 N zi ci kecume ncu nlum la,

kedanemene nang, RAMPAUBO, ncu peei gwang kelame de gidi la kemakne.

11 RAMPAUBE da ketwa lei tei gailu, Zion ga hegwang tei kebambe dage;

heleuhdung dage pa tei kegaidung de rangbeu lu.

12 Kedanemene hejai teulwa kelame dade hekum peibeu kelabe Tinggwang nsungla kecune;

keherei kebamme kehap kwa pa nsungtadi lama.

13 Acu ngaunggia gailo RAMPAUBO; pielo acu ngkau kelame dai kenzwa gede acu tei kehereila bi,

nang acu ketsai kirie gade teumpet beu lubui.

14 Oh, iciu eh Ih n hetwa pelane ranglialu kerane.

Zion napui kiriedung gade*

Ih n kelikelu ziemne a sui yila zie.

15 Heleuhdung de penui katei tei kegai kuiki ga nlüt dida;

penui pi penui ne hebai kaipwa kebam baih gage keu luda.

16 RAMPAUBE pekatei pecu peu cigai da; pa hetu tiak beu da;

kenlienme pekatei pe ta gade pecu keu dida. Selah

17 Kenlienmedung de peu caili dida nah Sheol gage langgai dida,

Tinggwang de nsungta kedi heleuhdung leune de.

18 Kedanemene maisia kelame de nsungtadi muilak kecune,

nah rei kelame regui de kelungta gah dilak.

19 Cuhlu, RAMPAUBO; peu tsaidi kelame de n reu ngkieng diso;

n dwa gade peu heleuhdung tiak lulo

20 Penuide tei ngngi gailo, RAMPAUBO;

peu heleuhdung de penui au mina tsaidi kelame lie kecu ci lulo. Selah