1 Nda de, RAMPAUBE, Ih nsiu lula;

peu madaude acu hengam ga kai diso.

2 Acu kelibeu nah n kesamsangbe gade acu peu kwak bamlu;

nkwen ada pung nreugwang lu nah acu kelilu.

3 Ih mie kegai leune ga tsura ge nzwa a kemsiu teibeu lalu;

nang acu kelibeu kerane aja kaibeu da,

kedanemene nang a tsura nah a kensiube.

4 Acu kelibeu, a Tinggwang, kesiame ba gade.

Mzui kemakme nah pezai kesiame ba gade.

5 Kedanemene nang a kereguibe, Rampaube RAMPAUBE.

A hena ne gade Ih ncu nlum la.

6 Apui za gade nangne acu ngha zütza gwang;

apui za gade acu ngngwa mpet kebeube au nang;

a hetwa de au n ziemne mui zie.

7 Ih au mina kekieege ziemne puisau ge;

nang au acu kegum kengkiengbe.

8 N hetwa le a mui pui dizie,

tingbazie pelane n herüt le.

9 A hecing tingdau acu kelien gi diso;

a kengkieng gah kedi dau acu püt diso.

10 Kedanemene a ngauraumedung a ha rangbam;

a teilung de pie kebamme ngkwa lwe ngkim eh mariem bam.

11 Penui rang eh, "Tinggwang pecu gi dida;

pe caisui eh pecu tuilu, kedanemene cika migede pecu kelibeu kera gah."

12 Tinggwang, ada de mdei diso;

a Tinggwang, acu ngha kera kelwa gai.

13 A teilung de ngaurau kelame de, peu penuide hengam tei nah ngkap dilu;

acu tei rezam neu kelame de peu ngam nah hengam teidi lulo.

14 Dede Ih au nda keregui bammui zie

nah ncu hetwa peu reureu zie.

15 A mui ne n kesamsang ha rang zie

nah n kelikelu tingbazie pelane,

Ih cide cicang melu liede.

16 Ih Rampaube RAMPAUBE kengkieng batadung teu eh gwang zie;

Ih n kesamsang de ndugai zie, ngu rünne.

17 Tinggwang, nang a hena ne gade acu ledeu beuda;

cu liede miswakegah nang tei kegaidung Ih ndu zie.

18 Kesang, Ih hecing di nah apeu pu kedi dau liede, Tinggwang, acu pütti so,

peciabe ceheu dage n kengkieng de Ih ndulia kebam nzwa,

n kengkieng gwang kera pelane dage.

19 N kesamsangbe liede, Tinggwang, cide hu zu;

nang ma kedidung tei kegaibe, Tinggwang, cauge nang nzwa no?

20 Nang acu keherei kekieege peu ngau kegaibe

anui de teimcang dai beuzie

nah hangdeu kang gade anui teucuh dai beuzie.

21 Nang acu ciswa de tei mdiki beu zie;

nang alung tei mla dai beu zie.

22 Ih leibung teu ncu tei keherei delie pwapeu zie

ncu nlumlu kebui de ziemne, a Tinggwang;

Ih leibung teu eh lei tei ncu twa zie,

Israel gu Kemci Ge.

23 Ih lei tei ncu twa kecudau a muileukung suiyi teu sahbak zie,

a rabe liede, nangne kelikebeu de.

24 Ih n masang ha mringbe ting rang zie;

kedanemene acu tei msia di zie lie kelame de ngkapdi nah peu ngamdi delu.