1 RAMPAUBE de ketwa peulo, pezi qu eh;

heleuhdung dage pe batadung peu ci gailo.

2 RAMPAUBE de ketwa lei tei lo;

pa miswakega batadung tei kegai pelane rang lo.

3 Kemci Rampaube zi gade nnui sui yilu;

Rampaube de peei kela leu de peu lungciep suiyi bamlu.

4 RAMPAUBE de peei lu nah pe kengkieng de;

pedwa ga gwang mui lu.

5 Nsungdai gailo Tinggwang miswakegah tei kegaidung de,

pa miswakegah bata tei kegaidung nah pa hezai kai kebeudung de.

6 Nnui pe kilabe Abraham leuhmedung,

nnui Jacob minadung, pa ne kedet kelu leuhmedung.

7 Pa au RAMPAUBE, anui Tinggwang.

Pesam kai kebeu au kideu pelane ziemne.

8 Pa kelungta samkak kelude kaipwa bam zie,

ceheu cang ge ziemne pe aja kai kebeudung.

9 Pa Abraham de ngngwa samkak kelude

nah Isaac dage pe sampet kai kebeu de kainzeu lu.✝

10 Pa Jacob de ngngwa samkak lu,

nah samkak aide Israelme da kelungta bam kera ge.

11 Pa rang eh cu, "Ih Canaan deude ncu peu zie,

cide pwa peu ncu gum zie".

12 Penui mina riak cam kebamdau pa aide ranggai,

camsüt kecudau, nah Canaan deuga sangme ge kecudau.

13 Penui deudi ge gade deudi gega rwagwang,

nah hegwangram ge gade keda ge ga.

14 Pa mige dede peu penuide teikeherei dima;

penuide ziemne pa hegwangme de kesiugai.

15 Pa rangdi, "Ih keniak kelumedung de tung so;

nah agu caihakecisam kerangmedung de tei rezam so."

16 RAMPAUBE penui deudi gage herakum langgai;

penui taktyei pelane keugi di.

17 Pa mige de penui dwa rai eh langgai;

Joseph de kilame ge nzwa eh zwa beu.

18 Pepi kena hegeu le kangdi;

pengwang gage hegeulwa ge kai pwabam.

19 Pa mrai kerang de teigwang kesang kemaktane.

RAMPAUBE sam ne pecu kedak pie.

20 Hegwangpei kilamedung de langgai pecu lungmpetdi kerane;

minadung reu kedime de pecu lungmpet beu.

21 Pa pecu peu pe ki kerengeibe teilu

pe mabam pelane reu keteube✝

22 hegwangpei kang ga kedime reu kengkieng keteu

nah pe hangkiamedung de maci ledeu kera kengkieng depeu.

23 Pecai Israel Egypt ga mie

nah Jacob tingkakge Ham deudi ga lungh di.

24 RAMPAUBE pe minadung de nalung kekiee ge peu,

nah penui ngauraumedung swade penuide tei ngking ki beu.

25 RAMPAUBE penui ngauraumedung depeu pe minadung de ngkaudi

peu pe kilamedung de teikeherei kerane.

26 Pa pe kilabe Moses de langgai,

nah Aaron, pane kedet kelube de.

27 Penui pe bata kedi teilia Egyptme kakgade,

miswakegah bata teigai Ham deudi gade.

28 Pa kemui langgai nah cipau deudi de tei muiting gai,

dede minadung pesam mzailu tadi.

29 Pa penui gu dui de hejai teidi

nah penui gu heka teitset di.

30 Penui deudi ga hegau le puidi,

hegwangme kibungdung kecangde.

31 RAMPAUBE pe sam kaigai, ge tammaine nah maisungne

deudi pelane ga puidi.

32 Pa penui tingrui de pwa tangheu tei di,

ting kehepik penui deu ga langgai.

33 Pa penui kubeluh nah nzüt bangdung ngkap di;

pa penui deudi ga tsingbangdung teicum di.

34 Pa pesam kaigai, ge tangrimdung gwang di,

tangrim kekiee ge.

35 Penui deuga tangriem ne ginia bang pelane tyeiteu di;

Penui meibang pelane tyei teudi.

36 Pa penui deudi ga neraibe pelane de teitset di,

penui kengkieng pelane pe tsi bui raitu kecudung.

37 Pecai pa Israelme de ngngwa mpet lu rangkanggeu nah kecak si eh;

pe leuhme migede lampui kiga rei di mene.

38 Egyptme penui tetti ge penui suiyi di,

kedanemene Egyptmedung penuide hing kedine.

39 Pa hemwa de kesung ge tei eh teizang gaibeu

nah tingmui gi mbaa kera mi teigai beu.

40 Israelme ketyeipok kie, ge pa nruinedung langgai beu

nah pa penuide peu tyeinggeilu kerane tinggim gade tangku peu.✝

41 Pa tsura ngkei gai, ge dui lwapet;

hereuki ge nzwa hetaideu ga lwa nghung.*

42 Pa pe kilabe Abraham dage

pe sam kemci kai kebeude nsung lu.

43 Pa pe minadung de suiyi eh ngngwampet lu,

pa ne kedet kelumedung de, ngkieng kelu sah eh.

44 Pa penuide mi kedame deudung pwapeu;

penui minadung mabam leune luulu

45 ciciu eh peu pe minadung de pe zai nzailu

nah pe sam kaikebeudung pelane nzailu kerane.

RAMPAUBE de twalu.*