1 RAMPAUBE a Tinggwang, Ih n dage nsiu gaila!

Acu gwa kelame dade keli beulo, nah ngha beulo.

2 Meliecai, hingho ge nzwa penui acu teurak dizie,

teu takcai di eh migede acu keli beu gailak dizie.

3 RAMPAUBE a Tinggwang, Ih aide teicai,

nah a ba ga kemau bamcai,

4 magade Ih a da lungciep kebambe da Ih kemau teidi liecai,

mede pekie gah eh cimene a ngauraume de rejam di liecai, ma aidungde tei dicai, a samdung kingnei gailo.

5 Ciucai peu a ngaurau de a teilung zui lu nah a dwa railu;

peu pecu a teilung pwa kideu gage pe pidau teilu

nah ada herüt kebamde peu rebui gage kai dilu. Selah

6 Cuhlu, RAMPAUBO, n rata le;

a ngauraume rata de renia eh cuh lo;

a ziemne nrak lulo nah kesamsang zai penui dage kai kebeude teigai lo.

7 Deudidung leune n taiga ngkwa twagwalu da;

nreule n hegwangbam gade penui reu kengkieng teu gailo.

8 RAMPAUBO, heleuhdung tu tiak gailo;

acu kelibeu lo, RAMPAUBO, kedanemene Ih masang nah mci kecune, Hutube Tinggwang.

9 Peu kemaume kesia tadung de tei sita lu, dede kesamsangme de tei ngkieng beu,

kesamsang Tinggwang, nang mi nlung nah mi kecetdung ncet kelabe.

10 A hegeu de Tinggwang dade gwangla,

petaube tei kebamme de kelibeu kelabe.

11 Tinggwang au kesamsang tutiakbe,

tingnai ramsangne makesia de ngkau kela Tinggwang.

12 Magade mige pe mau pet mecai, Tinggwang au pe kingtie mui teizie

nah pe lakpi hereu ziemne mtei luzie.✝

13 Pa hereunet pecu renia kerane mtei la;

pa pe lakpitsidung miheu le teilu.

14 Kemau gade tetlak kedime ge de cetgai pielo,

kengkap mariemdung pung kebamme, rejamlu kebui kenretdung nna kelume de.

15 Pa ma kuiki ge kuila nah pe kuiki tei lula

nah pa tei kegai kuiki de ga cak nlüt dila.

16 Pekatei pe kengkap mariemdung de peda cailigwang daila,

kedanemene pe zai kesia peda gwangdai kelane.

17 Ih RAMPAUBE de pe masang ziemne twala;

Ih RAMPAUBE Hutube Tinggwang da ketwalei teigai zie.