1 N ziemne, Zion namdi ga Tinggwang, anui ketwa kwabam;

anui samkak de n dage teugwang cangzie.

2 Nang kekie kingneikelabe,

n da pumteihbe pelane gwang zie.*

3 Kesiabedung anui reuga kiee reureu zeu;

anui teimau kedidung ziemne, nang penui mau gibeu zie.

4 Nang n da ngngwa gwang nna kera kedet kelube au samlam pung

ciu eh pa n kigu ga lungh kerane.

N ki keyidung ziemne anui mnung lu zie,

n kemci kerecaki.

5 Kesangbe gade nang heta keyidung tei eh anuide keli gaizie,

anuide kelikebeube Tinggwang;

kideube penlidung leune kereguibe au nang

nah jaaidi kemdei ga kebamme ziemne.

6 Kedanemene lamlwadung tei ntip kebamme au nang,

kengkieng le kang kelube au nang.

7 Jaaididung nra kwa de teinkam di kelabe au nang,

penui duicuidung kwa de,

nah minadung gu mra kwadung.*

8 Kideu tu gadung kelunghme au nang tei kegaidung de hing eh lala;

nang naimiak kepetle nah naimiak kenlütle de suiyi peu la.

9 Nang kideube de ngha kerane gwang; nang duirui gai;

nang cide tei ngkiee süt beu;

Tinggwang reuki au dui puiting bam;

nang kideube telei kegai dau nang minadung de meibui pwapeu.

10 Tangdei pu kelu ga nang dui kai ngkiee süt beu;

pu kelu pepeudung de nang tei nsam beula;

nang cide tingrui dui ne tei mnwa beula;

nang penui kakga mei keceudung samlam gai beula.

11 N zai keyi de luhtüt keyi dai kenzwa ge peu lano,

nah nang kemie leu ga mahei lula.

12 Hetaideu ga ceheidung hezim ne zau bam,

nah lamlwadung de suiyi ne kezui pwabam.

13 Ceheidung de kaune haudung ne kezui pwabam;

meibui ne chabakdung reu liede kezui pwabam;

penui suiyi ziemne sahbak, nah penui lei tei.