Lei kempwak muiteube ziemne. David gu lei ge.

1 Tinggimdung Tinggwang kemdu ranglia bam,

nah tingkamdung pe tadung peu cigai bam!

2 Tingnai ge cai tingnai ge sam ranglia bam;

tingmui ge cai tingmui ge pe maci keulia bam.

3 Marang kecu mede sam kerangdung de gah;

penui kwa siu lama.

4 Iciuliede penui samdung kideu reu pelane ga la,

nah penui samrang de kideu nli ga miecang la.

Cipaudung kakga pa tingnaimiak ziemne ki ge tei pwabam.*19:4 samria aide Paul ne Rom. 10:18 ga rangdai kecu tei, peu samliakeyi de mmipet silukera ria gade teu ranggai.

5 Tingnaimiak de lakciube pei nzwa pe kibung gade mpet kecu nzwada

nah mina kengkieng ge hezu nzu gaineu kela nzwada.

6 Tingnaimiak de tu ge lamde cuhla

nah ting tetkah eh tu ge lamge tetgai dila;

magede pe kelum de gade mbai gailak.

7 RAMPAUBE zai au yicang, rabe tei nring beula;

RAMPAUBE zierang au nlumlu kebui ge, maci kegame de maci peula.

8 RAMPAUBE saulia kegaidung au petau, mlungbe suiyi tei lula;

RAMPAUBE sam kai kebeudung au mci,

cide mi miak de kebaa peu la.

9 RAMPAUBE de kerüt au mci, kelungta bamla;

RAMPAUBE zaidung au kesang nah pelane petau ciak!

10 Cidungde au kecak swade pemi yiki, kecak yitube swade pemi kieeki;

cidungde au heliadui swade kumki nah helialip gade zau kemie heliaduidung swade.*19:10 Lei. 119:72,103

11 Yeo, penui dade n kilabe de rangmriak beu;*19:11 2 Jhn. 1:8, Lei. 119:11

penuide nzai keluga ziehi kedi ge bam.

12 Cauge pekatei pe maudung ngau lubui no?

Cikemak maudung gade acu tei mci beulo.

13 N kilabe acu peu hegiekela maudung gade nziadi lulo;

peu cidungde de a reu ngkieng diso.

Iciude Ih yicangsiak luzie,

nah Ih hezai gileu kedi maudung gade nzeulu kerane.*19:13 Pum. 15:30

14 Peu a mui samdung nah a nlung kecetdung

nang luulu kebui tei lulo,

RAMPAUBO, a tsura nah acu ri kebeube.