Kenlang leibungkekwame ziemne. David gu lei ge; pa Bathsheba ga miedi kecu cai caihakecibe Nathan pe da kegwangdau.

1 Acu ngaunggia lo, Tinggwang, n samkak kenlum de ziemne;

n ngaugia tadung kedi de zi gade, a maudung de tei ngga beulo.*51:1 Luk. 18:13

2 A zai kesiabedung gade acu hui cangsiak beu

nah a mau gade acu teimci beu.

3 Kedanemene Ih a maudung cibam,

nah a maudung a dwaga bam muila.*51:3 2 Sam. 12:13

4 Ncu renya, ncu rünne, Ih kemau teidi

nah n miakngau gade kesia teidi;

nang kerang dau nang au petau;

nang hetutiak kecudau nang au mzeu.*51:4 Luk. 15:18,21, Rom. 3:4

5 Pielo, acu au kemau gade mna lu;

a pui acu tetlaklu herizi, Ih au kemaume dida.

6 Pielo, nang alung kesangbe lu neula;

nah cika de nang acu maci ledeu beula.

7 Hyssop*51:7 Hyssop Hyssop was a small bush plant used for sprinkling water or blood on things and people in ceremonies of atonement and purification (see hyssop; Tet. 12:22; Lev. 14:1-7; Pum. 19:1-6, 16-19). le pwa acu teimci beulo, nah Ih mcilu kerane;

acu huibeu, nah Ih buising swade ha dizie.

8 Misuikeyi nah suiyibe peu acu siulo

ciu eh nang peradung teicum kedi de pe sui yilu kerane.

9 A maudung gade n zu kebaidi lu

a kemaudung pelane tei ngga beulo.

10 Helung kemci ge a nlung gage damgai beulo, Tinggwang,

nah rabe petausiakpe alung gage teiheci beulo.

11 N dwa gade acu gwagi diso,

nah n kemci Rabe ada de keuteu diso.

12 Nang n kelikelu suiyi de a dage teiheci dai lo,

nah rabe neungga eh acu teintie beulo.

13 Ciu eh Ih kemauketeime de n zaibe gade ledeu zie,

nah kemaumedung n da teu nreu gwang luzie.

14 Hejai lwa kegai de ziemne a mau gibeu lo, kelikelu a Tinggwang,

nah n samsangbe suiyi de ziemne Ih sahbak gaizie.

15 Rampaubo, a muileukung ngkei beulo,

nah a mui ncu ketwa ha rang zie.

16 Kedanemene retakdung ziemne nsuiyi lama, mecai Ih peu gai kera;

nang keru recadung de hengim bam ma.

17 Tinggwang a ratakdung au acu kegai deda.

Tinggwang, Nang, hena kegaime de nah helung nreu kelume de gidi lama.

18 Zion dage nnui suiyi eh keyibe teilu;

Jerusalem namdi tangdeudung de teincuh dailu.*51:18 Zion nah Jerusalem aikena de namdi ket da.

19 Iciu cai nang kesamsang reca de ga nsuiyi luzie ni,

keru recadung de nah keru recadung pelane;

ciu cai anui minadung hetumseudung n ratakbam ga pwagwang zie.