Salmos 86

N keku au dizu lie

David gu kekie ge.

1 A kekie kingnei gailo, RAMPAUBO, nah a kekei keli beulo,

kedanemene Ih au magah nah kengha teumaisia bam.

2 Acu gumlu, kedanemene Ih au samsang;

a Tinggwang, ncu nlum kebam n kilabe acu kelilu.

3 Acu ngaunggia lo, Rampaubo,

kedanemene Ih tingbazie pelane n dage hapgai bam.

4 N kilabe suiyi teilu,

kedanemene n dage, Rampaubo, Ih a rabe teucuh gaila.

5 Rampaubo, nang au yi, nah kemaugi kera kwabam,

nah n dage hap pet kegaime pelane de nang ngaugia kedi keulia.

6 RAMPAUBO, a kekie kingnei lo;

a nggia kwa de siulo.

7 Ih keherei kelu benai Ih ncu qula,

kadenemene nang acu keli zie.

8 Rabedung kakgade keukeda kera nang kenzwa mide gah, Rampaubo.

N tadung nzwa heta kedabe bam ma.

9 Heleuh pelane nangne tei kegaibe gwang nah n dwaga keumie zie, Rampaubo.

Penui n zi de herüt peuzie.✝86:9 Keu. 15:4

10 Kedanemene nang au di nah miswakegah tadung teigai;

nang rünne Tinggwang.

11 N zaidung acu ledeu beulo, RAMPAUBO. Ciciu lude Ih masang eh n sam mzai luzie.

A nlung pelane teu n ta tei kera acu ledeu beulo.

12 Rampaube a Tinggwang, a nlung pelane teu Ih ncu twa zie;

Ih n zi kelungta ndu lamui zie.

13 Kedanemene n samkak kesamsangbe ada au dizu;

Ketsaime deu kecok gade nang a teilung kelibeu da.

14 Tinggwang, pezai kesiame acu mmau cuh zeu.

Keregi kecu hemaa ge a teilung peeila dida.

Penui ncu rüt kecu ga.

15 Dede nang, Rampaubo, au ngaugiabe nah ngaugia Tinggwang,

zette rata lama, nah samkak kesamsangbe nah kenlum kesangbe ne kepui tei.

16 A taile nreugwang nah acu ngaunggia lo;

n kengkieng n kilabe de peulo;

n kila pui napei de kelibeu lo.

17 N ngaugia rehi ge acu keulia gailo.

Ciu eh acu ngau nghet kelame cide ngau luzie nah hengam gage kaizie

kedanemene nang, RAMPAUBE, acu nghabeu nah acu teirelui beuda.