1 אַז יִשׂרָאֵל איז אַרױס פֿון מִצרַיִם,

דאָס הױז פֿון יעקבֿ פֿון אַ װילדשפּראַכיקן פֿאָלק,

2 איז יהוּדה געװאָרן פֿאַר זײַן הײליקטום,

יִשׂרָאֵל זײַן געװעלטיקונג.

3 דער ים האָט דערזען און איז אַנטלאָפֿן,

דער יַרדן האָט אָפּגעטראָטן אַהינטער.

4 די בערג זײַנען געשפּרונגען װי װידערס,

די הײכן װי יונגע שאָף.

5 װאָס איז דיר, ים, װאָס דו לױפֿסט?

דו יַרדן, װאָס דו טרעטסט אָפּ אַהינטער?

6 איר בערג, װאָס איר שפּרינגט װי װידערס?

איר הײכן – װי יונגע שאָף?

7 פֿאַר אָדוֹן, טו ציטערן, ערד,

פֿאַר דעם אֱלוֹהַּ פֿון יעקבֿ,

8 װאָס פֿאַרקערט דעם פֿעלדז אין אַ טײַך װאַסער,

קיזלשטײן אין אַ װאַסערקװאַל.