תְּהִלִּים 87

1 פֿון די קינדער פֿון קֹרַח אַ מיזמור; אַ ליד.

זײַן גרונטפֿעסט איז אױף די הײליקע בערג.

2 ה׳ האָט ליב די טױערן פֿון צִיוֹן

מער פֿון אַלע װױנונגען פֿון יעקבֿ.

3 פּראַכטיקס װערט גערעדט פֿון דיר,

דו שטאָט פֿון אלֹקים.

סֶלָה.

4 איך דערמאָן רַהַבֿ און בָבֿל פֿאַר מײַנע באַקענטע;

אָט איז פּלֶשֶת, און צוֹר מיט כּוּש:

דער דאָזיקער איז אין איר געבאָרן געװאָרן.

5 אָבער פֿון צִיוֹן װערט געזאָגט:

דער און יענער איז דאָרטן געבאָרן געװאָרן,

און דער עליון אַלײן באַפֿעסטיקט זי.

6 ה׳ צײלט בײַם פֿאַרשרײַבן די פֿעלקער:

דער דאָזיקער איז דאָרטן געבאָרן געװאָרן.

סֶלָה.

7 יאָ, אַזױ װי די זינגער װי אַזױ אױך די טענצער זאָגן;

אַלע מײַנע ברונעם זענען אין דיר צִיוֹן.