תְּהִלִּים 53

1 פֿאַר דעם געזאַנגמײַסטער; אױף מַחלַת; אַ באַטראַכטונג פֿון דָוִדן.

2 דער נאַר זאָגט אין זײַן האַרצן: נישטאָ קײן אלֹקים!

פֿאַרדאָרבן זײַנען זײ, און מיאוסע אומרעכט טוען זײ;

קײנער טוט נישט קײן גוטס.

3 אלֹקים האָט פֿון הימל געלוגט אױף די מענטשנקינדער,

צו זען אױב פֿאַראַן אַ פֿאַרשטאַנדיקער װאָס זוכט אלֹקים.

4 איטלעכער איז אָפּגעפֿאַלן, אַלע זײַנען זײ פֿאַרדאָרבן,

קײנער טוט נישט קײן גוטס, נישט צו מאָל אײנער.

5 פֿאַר װאָר, האָט דען קײנער נישט פֿאַרשטאַנען פֿון די װאָס טאָן אומרעכט,

װעלכע עסן מײַן פֿאָלק אַזױ װי זײ עסן ברױט, און רופֿן נישט צו אלֹקים?

6 אָן אַנגסטן זײ אין אַנגסט, װוּ קײן אַנגסט איז נישט געװען,

װאָרעם אלֹקים האָט צעשאָטן די בײנער פֿון דײַן באַלעגערער;

האָסט זײ געמאַכט צו שאַנד, װײַל אלֹקים האָט זײ פֿאַראַכט.

7 װען קומט פֿון צִיוֹן די ישועה פֿון יִשׂרָאֵל?

װען אלֹקים קערט אום די געפֿאַנגענשאַפֿט פֿון זײַן פֿאָלק,

װעט לוסטיק זײַן יעקבֿ, װעט זיך פֿרײען יִשׂרָאֵל.