תְּהִלִּים 20

1 פֿאַר דעם געזאַנגמײַסטער; אַ מיזמור פֿון דָוִדן.

2 ה׳ װעט דיר ענטפֿערן אין טאָג פֿון נױט,

דיך װעט שטאַרקן דער נאָמען פֿון אלוקי יעקבֿ.

3 ער װעט שיקן דײַן הילף פֿון הײליקטום,

און פֿון צִיוֹן װעט ער דיך אונטערלענען.

4 ער װעט אַכטן אױף אַלע דײַנע שפּײַזאָפּפֿער,

און דאָס פֿעטס פֿון דײַן בראַנדאָפּפֿער װעט ער אָננעמען.

סֶלָה.

5 ער װעט דיר געבן לױט דײַן האַרצן,

און דײַן יעטװעדער באַראָט װעט ער דערפֿילן.

6 מיר װעלן זינגען אין דײַן ישועה,

און אין נאָמען פֿון אלוקינו װעלן מיר אַ פֿאָן הײבן;

ה׳ װעט דערפֿילן אַלע דײַנע פֿאַרלאַנגען.

7 אַצונד װײס איך אַז ה׳ העלפֿט זײַן געזאַלבטן,

ער װעט אים ענטפֿערן פֿון זײַן הײליקן הימל,

מיט די באַהילפֿיקע גבֿורות פֿון זײַן רעכטער האַנט.

8 די מיט רײַטװעגן, און די מיט פֿערד,

אָבער מיר װעלן דערמאָנען דעם נאָמען פֿון ה׳ אלוקינו.

9 זײ בײגן זיך און פֿאַלן,

און מיר הײבן זיך און שטעלן זיך װידער.

10 העלף דו, ה׳!

זאָל דער קיניג אונדז ענטפֿערן אין טאָג װאָס מיר רופֿן.