1 Inu anthu anga imvani chiphunzitso changa;

mvetserani mawu a pakamwa panga.

2 Ndidzatsekula pakamwa panga mʼmafanizo,

ndidzayankhula zinthu zobisika, zinthu zakalekale

3 zimene tinazimva ndi kuzidziwa,

zimene makolo athu anatiwuza.

4 Sitidzabisira ana awo,

tidzafotokozera mʼbado wotsatira

ntchito zotamandika za Yehova,

mphamvu zake, ndi zozizwitsa zimene Iye wachita.