1 Umunago uzova ku gishitsi ca Dawidi,

kandi ishami riva ku mizi yaco rizokwama ivyamwa.

2 Mpwemu w’Uhoraho azoba kuri we;

ni we Mpwemu w’ubwenge n’ugutahura,

Mpwemu w’ukuja inama kandi w’ububasha,

Mpwemu w’ubumenyi n’ukwubaha Uhoraho.

3 Azonezerezwa no kwubaha Uhoraho.

Ntazoca imanza afatiye ku vyo abonesheje amaso,

canke ngo afatire ingingo ku vyo yumvise;

4 ahubwo abakene azobacira izigororotse,

azotunganiriza aboro bo kw’isi bose.

Azokubitisha isi inkoni yo mu kanwa kiwe,

kandi impwemu zo mu kanwa kiwe zizotikiza abagarariji.

5 Ukugororoka kuzoba nk’umukanda,

kandi ubwizigirwa azobwambara mu rukenyerero.

6 Ico gihe amabingira azobana n’imyagazi y’intama,

ingwe iryamane n’impene,

inyana y’inka igendane n’intare,

biragirwe n’umwana mutoya.

7 Inka izorisha hamwe n’idubu,

inyana zavyo zizoryamana,

intare zizorisha ubwatsi nk’inka.

8 Umwana yonka azokinira ku mwobo w’imvuvyi,

n’umucuko azoshira ukuboko kwiwe mu mwobo w’inkoma.

9 Nta bizoba bikiryana canke ngo vyonone

ku musozi wanje wera iyo uva ukagera,

kuko isi izokwuzura ukumenya Uhoraho,

nk’uko amazi yuzura ikiyaga.

10 Ico gihe uwukomoka kuri Isayi azoba ibendera ry’agakiza k’isi yose; amahanga yose azokwifatanya na we, kandi ikibanza c’uburuhukiro bwiwe kizoba ic’ubwiza. 11 Ico gihe Uhoraho azoramvura ukuboko kwiwe ubugira kabiri, agarukane amasigarira y’abantu biwe abakuye muri Ashuri, abadugane abakuye muri Egiputa, muri Etiyopiya, muri Elamu, i Babiloni, i Hamati, no mu mazinga yo mu biyaga.

12 Azodugiriza ibendera amahanga,

yegeranye Abisirayeli basabagiye.

Azokwegeranya ubwoko bw’Abayuda bwashwiragiye,

abakure ku mpande zine z’isi.

13 Ni ho ishari rya Efurayimu rizokamanganira,

abansi ba Yuda na bo bahaherengeterezwe;

Efurayimu ntazokwongera kugirira ishari Yuda,

canke ngo Yuda agirire urwanko Efurayimu.

14 Bazokwiyunga, bacakire imisozi y’Abafilisitiya mu burengero,

kandi bazoja hamwe banyage amahanga yo mu buseruko.

Bazokwigarurira Edomu na Mowabu,

kandi Abamoni bazoba abagurano babo.

15 Uhoraho azokamya ikigobe c’ikiyaga ca Egiputa,

azohungabanisha uruzi Efurate ukuboko kwiwe.

Azorucamwo imigende indwi,

kugira ngo abantu bashobore kurujabuka bambaye isandare.

16 Hazobaho inzira yagutse ku bantu biwe b’amasigarira

bazoza bavuye muri Ashuri,

nk’iyo Abisirayeli

baciyemwo bava muri Egiputa.