1 हे परमेसवर, तू जिसकी मै स्तुति करुँ सूं, चुप ना रह!

2 क्यूँके दुष्ट अर कपटी माणसां नै मेरे खिलाफ मुँह खोल्या सै,

वो मेरै बारै म्ह झूठ बोल्‍लै सै।

3 उननै बैर के वचनां तै मेरे ताहीं चारु ओड़ तै घेर लिया सै,

अर खाम्मे-खा मेरे तै लड़ै सै।

4 मेरे प्यार कै बदलै म्ह वो मेरे तै चुगली करै सै,

पर मै तो प्रार्थना म्ह मगन रहूँ सूं।

5 उननै भलाई के बदले म्ह मेरे तै बुराई करी

अर मेरे प्यार कै बदले मेरे तै बैर करया सै।

6 तू उसनै किसे दुष्ट के अधिकार म्ह राख,

अर कोए बिरोधी उसकी सोळी ओड़ खड्या रहवै।

7 जिब उसका न्याय करया जावै, फेर वो दोषी लिकड़ै,

अर उसकी प्रार्थना पाप गिणी जावै!

8 उसके दिन थोड़े हों,

अर उसके पद नै दूसरा ले!

9 उसके बाळक अनाथ हो जावै

अर उसकी औरत बिधवा हो जावै!

10 अर उसके बाळक मारे-मारे फिरै, अर भीख मांग्या करै;

उननै अपणे उजड़े होए घर तै दूर जाकै टुकड़े माँगणा पड़ै!*

11 साहूकार फन्‍दा लगाकै, उसका सब किमे ले ले;

अर परदेशी उसकी कमाई नै लूट ले!

12 कोए ना हो जो उसपै दया करदा रहवै,

अर उसके अनाथ बाळकां पै कोए तरस ना करै!

13 उसका वंश नाश हो जावै,

दुसरी पीढ़ी म्ह उसका* नाम मिट जावै!

14 उसके बाप-दाद्यां का अधर्म यहोवा नै याद रहवै,

अर उसकी माँ का पाप ना मिटै!

15 वो लगातार यहोवा कै स्याम्ही रहवै, ताके

वो उनका नाम धरती पै तै मिटा दे!

16 क्यूँके वो दुष्ट, दया करणा भूल ग्या

फेर भी दीन अर गरीबां नै सताया करै था

अर मार गेरण की इच्छा तै दुखी मन आळयां कै पाच्छै पड्या रहवै था।

17 वो श्राप देण तै प्यार राक्खै था, अर श्राप उसपै आ पड्या;

वो आशीर्वाद देण तै खुश ना होवै था,

इस करकै आर्शीवाद उसतै दूर रहया।

18 वो श्राप देणा कपड़े की तरियां पैहरा था,

अर वो उसके पेट म्ह पाणी की तरियां

अर उसकी हाड्डियाँ म्ह तेल की तरियां समा ग्या।

19 वो उसकै खात्तर ओढ़णे का काम दे,

अर फेंटे की तरियां उसका कटिबन्ध लगातार कस्या रहवै।

20 यहोवा की ओड़ तै मेरे बिरोधियाँ नै,

अर मेरे खिलाफ बुरा कहण आळयां नै न्यूए बदला मिलै!

21 पर मेरे तै हे यहोवा प्रभु, तू अपणे नाम के मुताबिक बरताव कर;

तेरी करुणा तो बड़ी सै, इस करकै तू मन्‍नै छुटकारा दे!

22 क्यूँके मै दीन अर गरीब सूं,

अर मेरा दिल घायल होया सै।

23 मै ढळती होई छाया की तरियां जान्दा रहया सूं;

मै टिड्डी की तरियां उडा दिया गया सूं।

24 उपवास करदे-करदे मेरे घुटने कमजोर होगे;

अर मेरे म्ह चर्बी ना रहण तै मै सूख ग्या सूं।

25 मेरी तो उन माणसां तै बदनामी होवै सै;

जिब वो मन्‍नै देक्खै, फेर सिर हिलावै सै।

26 हे मेरे परमेसवर यहोवा, मेरी मदद कर!

अपणी करुणा कै मुताबिक मेरा उद्धार कर!

27 जिसतै वो जाण ज्या के यो तेरा काम सै,

अर हे यहोवा, तन्‍नै ए यो करया सै!

28 वे मन्‍नै कोसदे तो रहवै, पर तू आशीष दे!

वो तो उठदे ए शर्मिन्दा हों, पर तेरा दास खुश हो!

29 मेरे बिरोधियाँ नै बेजती के कपड़े पिरहाये जावै,

अर वो अपणी बेजती नै काम्बळ की तरियां ओढ़ै!

30 मै यहोवा का भोत धन्यवाद करुँगा,

अर भोत लोगां कै बीच म्ह उसकी स्तुति करुँगा।

31 क्यूँके वो गरीब की मदद करैगा*,

ताके उसनै मौत की सजा देण आळयां तै बचावै।