1 मेरे प्रभु तै यहोवा की या वाणी सै, "तू मेरे सोळे हाथ नै बैठ,

जिब ताहीं मै तेरे दुश्मनां नै तेरे पैंरां की चौकी ना कर देऊँ।"

2 तेरी शक्ति का राजदंड यहोवा सिय्योन तै बढ़ावैगा।

तू अपणे दुश्मनां कै बीच म्ह राज कर।

3 तेरी प्रजा के माणस तेरे पराक्रम कै दिन अपणी मर्जी तै स्वेच्छाबलि बणै सै;

तेरे जवान लोग पवित्रताई तै शोभायमान,

अर सबेरै कै गर्भ तै पैदा होई ओस की तरियां तेरे धोरै सै।

4 यहोवा नै कसम खाई अर ना पछतावैगा,

"तू मलिकिसिदक की तरियां सदा खात्तर याजक सै।"

5 प्रभु तेरे सोळे ओड़ होकै

अपणे छो कै दिन राजयां नै चूर कर देवैगा।

6 वो जात-जात म्ह न्याय चुकावैगा, रणभूमि लाशां तै भर ज्यागी;

वो लम्बे-चौड़े देश के प्रधानां नै चूर-चूर कर देगा।

7 वो राह म्ह चाल्दे-चाल्दे नदी का पाणी पीवैगा

अर फेर वो जीत कै बाद अपणे सिर नै ऊँच्‍चा करैगा।