1 जिस तरियां हिरणी नदी के पाणी खात्तर तिसाई सै,

उस्से तरियां, हे परमेसवर, मै तेरे खात्तर तिसाया सूं।

2 जिन्दे परमेसवर, हाँ परमेसवर, का मै प्यासा सूं,

मै कद जाकै परमेसवर नै अपणा मुँह दिखाऊँगा?

3 मै दिन अर रात अपणे आँसुआँ नै पीन्दा रहूँ सूं;

अर लोग दिन भर मेरे तै कहवै सै,

तेरा परमेसवर कित्त सै?

4 मै किस तरियां भीड़ कै गैल जाया करुँ था,

मै जयजयकार अर धन्यवाद कै गैल

त्यौहार मनाण आळी भीड़ कै बीच म्ह परमेसवर कै भवन

म्ह धीरै-धीरै जाया करुँ था; या याद करकै मेरा जी शोकित हो जावै सै।

5 हे मेरे जी, तू क्यूँ गिरया जावै सै?

अर तू भित्तर ए भित्तर क्यूँ व्याकुल सै?

परमेसवर पै आस लगाये रहै;

क्यूँके मै उसके दर्शन तै उद्धार पाकै फेर उसका धन्यवाद करुँगा।

6 हे मेरे परमेसवर; मेरा जी भित्तर तै गिरया जावै सै,

इस करकै मै यरदन कै धोरै के देश तै अर हेर्मोन

के पहाड़ां अर मिसगार की पहाड़ी कै उप्पर

तै तन्‍नै याद करुँ सूं।

7 तेरी जलधाराओं का शब्द सुणकै

पाणी नै बुलावै सै; तेरी सारी तरंगां

अर लहरां म्ह, मै डूब ग्या सूं।

8 तोभी यहोवा दिन म्ह अपणी शक्ति

अर करुणा दिखावैगा;

अर रात नै भी मै उसका गीत गाऊँगा,

अर अपणे जीवनदात्ता परमेसवर तै प्रार्थना करुँगा।

9 मै परमेसवर जो मेरी चट्टान सै कहूँगा,

"तू मन्‍नै क्यूँ भूल ग्या?

मै दुश्मन के जुल्म के मारे क्यूँ शोक का

पैहरावा पैहरी चाल्‍लुँ-फिरूँ सूं?"

10 मेरे सताण आळे जो मेरी बुराई करै सै,

मान्‍नो उसतै मेरी हाड्डी चूर-चूर हो सै,

मान्‍नो कटार तै छिदी जावै सै,

क्यूँके वे दिन भर मेरे तै कहन्दे रहवै सै, तेरा परमेसवर कित्त सै?

11 हे मेरे जी तू क्यूँ गिरया जावै सै?

अर तू भित्तर ए भित्तर क्यूँ व्याकुल सै?

परमेसवर पै भरोस्सा राख;

क्यूँके वो मेरे मुख की चमक अर मेरा परमेसवर सै,

मै फेर उसका धन्यवाद करुँगा।