1 यहोवा खात्तर एक नया गीत गाओ,

हे सारी धरती के माणसों यहोवा खात्तर गाओ!

2 यहोवा खात्तर गाओ, उसके नाम नै धन्य कहो;

हर रोज उसके करे होए उद्धार की खुशखबरी सुणान्दे रहो।

3 गैरजात्तां म्ह उसकी महिमा का,

अर देश-देश के माणसां म्ह उसके अदभुत काम्मां का जिक्र करो।

4 क्यूँके यहोवा महान अर घणा स्तुति कै लायक सै;

वो तो सारे देवत्यां तै घणा भययोग्य सै।

5 क्यूँके देश-देश के सारे देवता तो मूर्त ए सै;

पर सुर्ग यहोवा नै ए बणाया सै।

6 उसके च्यांरु ओड़ महिमा अर ताकत सै;

उसके पवित्र स्‍थान म्ह सामर्थ्य अर शोभा सै।

7 हे देश-देश के कुलों, यहोवा का गुणगान करो,

यहोवा की महिमा अर सामर्थ्य नै मान्‍नो!

8 यहोवा कै नाम की इसी महिमा करो जो उसके योग्य सै;

भेंट लेकै उसके आँगणां म्ह आओ!

9 पवित्रता तै शोभामान होकै यहोवा नै दण्डवत करो;

हे सारी धरती के माणसों उसकै स्याम्ही कापते रहो!

10 जात-जात म्ह कहो, "यहोवा राजा होया सै!

अर दुनिया इसी मजबूत सै, के वो टळण की कोनी;

वो देश-देश के माणसां का न्याय खराई तै करैगा।"

11 अकास आनन्द मनावै, अर धरती मगन हो;

समुन्दर अर उस म्ह की सारी चीज गरज उठै;

12 मैदान अर जो कुछ उस म्ह सै, वो प्रफुल्‍लित हो;

उसे बखत बण के सारे दरखत जयजयकार करैगें।

13 यो यहोवा कै स्याम्ही हो, क्यूँके वो आण आळा सै।

वो धरती का न्याय करण आण आळा सै, वो धर्म तै दुनिया का,

अर सच्‍चाई तै देश-देश के लोगां का न्याय करैगा।