1 हे राज करण आळेयो*, के थम सच म्ह ए धार्मिकता की बात बोल्‍लो सों?

अर हे आदम जात, के थम सिधाई तै फैसला करो सों?

2 न्ही, थम मन ए मन म्ह बुरे काम करो सो;

थम पूरे देश म्ह दंगे करदे जाओ सों।

3 दुष्ट माणस जन्‍म तैए पराए हो जावै सै,

वे पेट तै लिकड़ती ए झूठ बोलदे होए भटक जावै सै।

4 उन म्ह साँप का जिसा जहर सै;

वे उस नाग की तरियां सै, जो सुणणा न्ही चाहन्दा;

5 अर सपेरा कितनी ही चालाकी तै क्यूँ ना मंत्र पढ़ै,

फेर भी वो उसकी न्ही सुणदा।

6 हे परमेसवर, उनके मुँह म्ह तै दान्दां नै तोड़दे;

हे यहोवा उन जवान शेरां की जाड़ां नै उखाड़ दे।

7 वो घुळ कै बहन्दे होए पाणी की तरियां हो जावै;

जिब वो अपणे तीर चढ़ावै, तो तीर मान्‍नो दो टुकड़े हो जावै।

8 वो घोंघे की तरियां हो जावै जो घुळ कै नाश हो जावै सै,

अर औरत के गिरे होए गर्भ की तरियां हो जिसनै सूरज ताहीं देख्या ए ना हो।

9 इसतै पैहले की थारी हाड्डियाँ म्ह काँड्या की आँच लाग्गै,

हरे अर जळे, दोनुआ ताहीं वो भम्बुळिये तै उड़ा ले जावैगा।

10 परमेसवर का इसा बदला देखकै वो खुश होवैगा;

वो अपणे पैरां नै दुष्ट के खून म्ह धोवैगा।

11 फेर माणस कहण लाग्गे, पक्‍का धर्मी खात्तर फळ सै;

पक्‍का परमेसवर सै, जो धरती पै न्याय करै सै।