1 हे मेरे धर्मी परमेसवर,

जिब मै पुकारूँ तब मन्‍नै जवाब दे; जिब मै बिप्दा म्ह पड्या तो तन्‍नै मेरे ताहीं सहारा दिया।

मेरै पै दया कर अर मेरी प्रार्थना सुण ले।

2 हे माणसों, कद ताहीं मेरी महिमा का अनादर होंदा रहवैगा?

थम कद ताहीं बेकार की बात्तां तै लगाव राक्खोगे अर झूठ्ठी युक्ति की टोह् म्ह रहोगे?

3 या जाण ल्यो के यहोवा नै अपणे भगत ताहीं अपणे खात्तर न्यारा छाँट राख्या सै,

जब मै यहोवा नै पुकारूँगा तो वो मेरी सुण लेगा।

4 काँपते रहो अर पाप ना करो;

अपणे-अपणे बिछोणे पै मन ए मन म्ह ध्यान करो अर चुपचाप रहो। (सेला)

5 धार्मिकता के बलिदान चढ़ाओ,

अर यहोवा पै भरोस्सा राक्खो।

6 घणखरे सै जो कहवै सै, "कौण हमनै कुछ भलाई दिखावैगा?"

हे यहोवा, तू अपणे मुँह का चान्दणा म्हारै पै चमका!

7 तन्‍नै मेरै मन म्ह उसतै घणा आनन्द भर दिया सै,

जो उननै नाज अर दाखमधु की बढ़ोतरी तै होवै सै।

8 मै शान्ति तै लेट जाऊँगा अर सो जाऊँगा,

क्यूँके, हे यहोवा, सिर्फ तू ए मन्‍नै निश्चिन्त रहण देवै सै।