1 हे मेरे परमेसवर, हे राजा, मै तन्‍नै सराहूँगा,

अर तेरे नाम नै सदा-सदा धन्य कहन्दा रहूँगा।

2 हर रोज मै तन्‍नै धन्य कह्या करुँगा,

अर तेरे नाम की स्तुति सदा-सदा करदा रहूँगा।

3 यहोवा महान अर घणी स्तुति कै लायक सै,

अर उसकी स्तुति अगम सै।

4 तेरे काम्मां की स्तुति अर तेरे पराक्रम के काम्मां का जिक्र,

पीढ़ी-पीढ़ी तक होन्दा चल्या जावैगा

5 वे एक-दुसरे तै तेरे ऐश्‍वर्य की महिमा के प्रताप की बात करैगें

अर मै तेरे न्यारे-न्यारे अचम्भे के काम्मां पै ध्यान करुँगा।*

6 लोग तेरे भयानक काम्मां की शक्ति की चर्चा करैगें,

अर मै तेरे बड़े-बड़े काम्मां का चर्चा करुँगा।

7 लोग तेरी बड़ी भलाई नै याद करकै उसका वर्णन करैगें,

अर तेरे धर्म का जयजयकार करैगें।

8 यहोवा अनुग्रहकारी अर दयालु,

देर तै छो करण आळा अर घणा करुणामय सै।

9 यहोवा सारया खात्तर भला सै,

अर उसकी दया उसकी सारी सृष्टि पै सै।

10 हे यहोवा, तेरी सारी सृष्टि तेरा धन्यवाद करैगी,

अर तेरे भक्‍त तन्‍नै धन्य कह्या करैगें!

11 वो तेरे राज्य की महिमा की चर्चा करैगें,

अर तेरे पराक्रम कै बारै म्ह बात करैगें;

12 के वो माणसां पै तेरे पराक्रम के काम

अर तेरे राज्य के प्रताप की महिमा प्रगट करैं।

13 तेरा राज युग-युग का

अर तेरी प्रभुता सारी पीढ़ियाँ पै बणी रहवैगी।

14 यहोवा सारे गिरदे होया नै सम्भाळै सै,

अर सारे झुके होया नै सीध्धा खड्या करै सै।

15 सारया की आँख तेरी ओड़ लाग्गी रहवै सै,

अर तू उननै बखत पै खाणा देवै सै

16 तू अपणी मुट्ठी खोल कै,

सारे प्राणियाँ नै खाणे तै छिकावै सै।

17 यहोवा अपणी सारी चाल म्ह धर्मी

अर अपणे सारे काम्मां म्ह करुणामय सै।

18 जितने यहोवा नै पुकारै सै, यानिके जितने उसनै सच्‍चाई तै पुकारै सै;

उन सारया कै वो धोरै रहवै सै।

19 वो अपणे डरणियाँ की मर्जी पूरी करै सै,

अर उनकी दुहाई सुणकै उनका उद्धार करै सै।

20 यहोवा अपणे सारे प्रेमियाँ की तो सम्भाल करै सै,

पर सारे दुष्टां का सत्यानाश करै सै।

21 मै यहोवा की स्तुति करुँगा,

अर सारे प्राणी उसके पवित्र नाम नै सदा-सदा धन्य कहन्दे रहवै।