भजन संहिता 54

उद्धार खात्तर प्रार्थना

प्रधान बजाण आळे खात्तर, दाऊद का तारकले बाज्यां कै गैल मश्कील जिब जीपियों नै आकै शाऊल तै कह्या, "के दाऊद म्हारे बीच म्ह छिप्या न्ही रहन्दा?"

1 हे परमेसवर अपणे नाम के जरिये मेरा उद्धार कर,

अर अपणे पराक्रम तै मेरा न्याय कर।

2 हे परमेसवर, मेरी प्रार्थना सुण ले,

मेरे मुँह के वचनां की ओड़ कान लगा।

3 क्यूँके परदेशी*54:3 परदेशी घमण्डी मेरे बिरुध्द उठ्ठे सै,

अर कुकर्मी मेरी जान के गाहक होए सै,

उननै परमेसवर ताहीं अपणे स्याम्ही न्ही जाण्या।

4 देक्खो, परमेसवर मेरा मददगार सै;

प्रभु मेरी जान नै सम्भाळण आळा सै।

5 वो मेरे बिरोधियाँ की बुराई नै उनपै ए उल्टा देवैगा;

हे परमेसवर, अपणी सच्‍चाई के कारण उनका नाश कर।

6 मै तेरे ताहीं स्वेच्छाबलि चढ़ाऊँगा;

हे यहोवा, मै तेरे नाम का धन्यवाद करुँगा,

क्यूँके यो उत्तम सै।

7 क्यूँके तन्‍नै मेरे ताहीं सारे दुखां तै छुड़ाया सै,

अर मै अपणे दुश्मनां पै जीत कै गैल निगांह करी सै।