भजन संहिता 111

परमेसवर की सच्‍चाई अर न्याय खात्तर स्तुतिगान

1 परमेसवर की स्तुति करो। मै सीध्धे माणसां की सभा म्ह

अर मण्डळी म्ह सारे मन तै यहोवा का धन्यवाद करुँगा।

2 यहोवा के काम बड़े सै,

जितने उसतै खुश रहवैं, वो उनपै ध्यान लगावै सै।

3 उसकै काम वैभवशाली अर शोभायमान होवै सै,

अर उसका धर्म सदा तक बण्या रहवैगा।

4 उसनै अपणे अचम्भे के काम याद कराये सै;

यहोवा अनुग्रह करण आळा अर दयावंत सै।

5 उसनै अपणे डरण आळयां तै खाणा दिया सै;

वो अपणे करार नै सदा तक याद राक्खैगा।

6 उसनै अपणी प्रजा तक जात-जात का भाग देण खात्तर,

अपणे काम्मां का प्रताप दिखाया सै।

7 सच्‍चाई अर न्याय उसके हाथ्थां के काम सै;

उसके सारे उपदेश बिश्वास लायक सै।

8 वो कदे भी न्ही टळैगें;

वो सच्‍चाई अर सिधाई तै करे होए सै।

9 उसनै अपणी प्रजा का उद्धार करया सै;

उसनै अपणे करार ताहीं सदा खात्तर ठहराया सै।

उसका नाम पवित्र अर भययोग्य सै।

10 बुद्धि की जड़ परमेसवर का डर सै;

जितने उसके हुकमां नै मान्‍नै सै,

उनकी समझ आच्छी होवै सै।

उसकी स्तुति सदा बणी रहवैगी।