1 यहोवा की स्तुति करो!

यहोवा की स्तुति सुर्ग म्ह तै करो,

उसकी स्तुति ऊँच्‍ची जगहां म्ह करो!

2 हे उसके सारे दूतों, उसकी स्तुति करो;

हे उसकी सारी सेना उसकी स्तुति करो!

3 हे सूरज अर चाँद उसकी स्तुति करो,

हे सारे चमकण आळे तारागण उसकी स्तुति करो!

4 हे सारया तै ऊँच्‍चे अकास,

अर हे अकास कै उप्पर आळे पाणी, थम दोन्‍नु उसकी स्तुति करो।

5 वो यहोवा कै नाम की स्तुति करैं,

क्यूँके उसे नै हुक्म दिया अर ये बणाए गये।

6 अर उसनै उन ताहीं सदा खात्तर मजबूत करया सै;

अर इसी विधि ठहराई सै, जो टळ न्ही सकदी।

7 धरती पै तै यहोवा की स्तुति करो,

हे समुन्दरी अजगरों अर ढुंघे समुन्दर,

8 हे आग अर ओळों, हे बर्फ अर बादळो,

हे उसका वचन मानण आळी घणी तेज आन्धी।

9 हे पाहाड़ों अर सारे टीलों,

हे फळ देण आळे दरखतां अर सारे देवदारों!

10 हे जंगळी पशुओ अर घरेलू पशुओं,

हे रेंगण आळे जन्‍तुओं अर हे पंछियों!

11 हे धरती के राजाओं, अर राज्य-राज्य के सारे माणसों,

हे हाकिमों अर धरती के सारे न्याय करण आळेयो!

12 हे जवानों अर कुमारियों,

हे बुजुर्गों अर बाळकों!

13 यहोवा कै नाम की स्तुति करो,

क्यूँके सिर्फ उसे का नाम महान सै;

उसका ऐश्‍वर्य धरती अर आसमान कै उप्पर सै।

14 अर उसनै अपणी प्रजा खात्तर एक सींग ऊँच्‍चा ठाया सै,

या उसके सारे भगतां खात्तर

यानिके इस्राएलियाँ खात्तर अर उसकै धोरै रहण आळी प्रजा खात्तर स्तुति करण का कारण सै

यहोवा की स्तुति करो!