1 जिब माणसां नै मेरे तै कह्या, "आओ हम यहोवा के घर नै चाल्‍लां"

फेर मै घणाए खुश होया।

2 हे यरुशलेम, तेरे फाटकां कै भित्तर,

हम खड़े होगे सां।

3 हे यरुशलेम, तू इस तरियां के नगर कै बराबर बण्या सै,

जिसके घर एक-दुसरे तै मिले होए सै।

4 ओड़ै यहोवा के गोत्र-गोत्र के माणस यहोवा के नाम का धन्यवाद करण नै जावै सै;

या इस्राएल खात्तर गवाई सै।

5 ओड़ै तो न्याय के सिंहासन,

दाऊद के कुण्बे खात्तर धरे होए सै।

6 यरुशलेम की शान्ति का वरदान माँग्गो,

तेरे प्रेमी सही-सलामत रहवै।

7 तेरे नगर की चारदीवारी* कै भित्तर शान्ति,

अर तेरे महल्‍लां म्ह सलामती होवै!

8 अपणे भाईयाँ अर साथियाँ कै कारण,

मै कहूँगा के थारे म्ह शान्ति होवै!

9 अपणे परमेसवर यहोवा के घर कै कारण,

मै तेरी भलाई नै टोहऊँगा*।