1 हे मेरे परमेसवर, हे मेरे परमेसवर,

तन्‍नै मेरे ताहीं क्यूँ छोड़ दिया?

तू मेरी बुलाहट तै अर मेरी मदद करण तै

क्यूँ दूर रहवै सै? मेरा उद्धार कित्त सै?

2 हे मेरे परमेसवर, मै दिन म्ह पुकारूँ सूं

पर तू जवाब न्ही देंदा;

अर रात नै भी मै चुप न्ही रहन्दा।

3 पर तू जो इस्राएल की बड़ाई कै सिंहासन पै विराजमान सै,

तू तो पवित्र सै।

4 म्हारे पूर्वज तेरे पै भरोस्सा राक्खै थे,

वे भरोस्सा राक्खै थे,

अर तू उननै छुड़ावै था।

5 उननै तेरी दुहाई दी अर तन्‍नै वे छुड़ाये

वे तेरे पै भरोस्सा राक्खै थे

अर कदे शर्मिन्दा कोन्या होए।

6 पर मै कीड़ा सूं, माणस कोन्या;

माणसां म्ह मेरी बदनामी सै,

अर लोग्गां म्ह मेरा अपमान होवै सै।

7 वो सारे जो मन्‍नै देक्खै सै मेरा मजाक बणावै सै,

अर होठ बिचकाते

अर या कहन्दे होए सिर हिलावै सै,

8 वे कहवै सै, "वो यहोवा पै भरोस्सा राक्खै सै,

यहोवा उसनै छुड़ावै,

वो उसनै उभारै क्यूँके वो उसतै राज्जी सै।"

9 पर तन्‍नै ए मै गर्भ तै लिकाड्या;

जिब मै दूध-पीत्ता बाळक था,

जब तै तन्‍नै मेरे ताहीं भरोस्सा राखणा सिखाया।

10 मै जन्म तै ए तेरे पै छोड़ दिया गया,

माँ के कोख तै ए तू मेरा परमेसवर सै।

11 मेरे तै दूर ना हो क्यूँके संकट धोरै सै,

अर कोए मददगार कोन्या।

12 घणे सारे सांड्डां नै मेरे ताहीं घेर लिया सै,

बाशान के तगड़े सांड मन्‍नै च्यांरु ओड़ तै घेरे खड़े सै।

13 वे पाड़ण आळे अर गरजण आळे शेर की तरियां

मेरे पै अपणा मुँह पाड़े खड़े सै।

14 मै पाणी की तरियां बह ग्या,

अर मेरी सारी हाड्डियाँ के जोड़ उखड़गे,

मेरा दिल मोम होग्या,

वो मेरी देह कै भित्तर पिंघळ ग्या।

15 मेरी ताकत* खतम होगी, मै ठीकरा होग्या;

अर मेरी जीभ मेरे ताळवै तै चिपगी;

अर तू मन्‍नै मार के माट्टी म्ह मिला देवै सै।

16 क्यूँके कुत्याँ नै मै घेर लिया सूं:

कुकर्मिया की मण्डळी मेरे च्यांरु ओड़ तै मन्‍नै घेरे खड़ी सै;

वो मेरे हाथ अर मेरे पायां नै छेदै सै।

17 मै मेरी सारी हाड्डी गिण सकूँ सूं;

वे मन्‍नै देक्खै अर घूरै सै;

18 मेरे लत्ते आप्पस म्ह बाट ले सै,

अर मेरे पिराहवै पै पर्ची लिकाड़ै सै।

19 पर हे यहोवा तू मेरे तै दूर ना रहै!

हे मेरे मददगार, मेरी मदद खात्तर फुर्ती कर!

20 मेरे प्राण नै तलवार तै बचा,

मेरी जान नै कुत्याँ के पंजां तै बचाले!

21 मन्‍नै शेर के मुँह तै बचा,

मै जो सताया होया सूं, जंगळी सांड के सीन्गां तै तू मन्‍नै बचा।

22 मै अपणे भाईयाँ के स्याम्ही तेरा प्रचार करुँगा,

सभा कै बीच तेरी बड़ाई करुँगा।

23 हे यहोवा के भय मानण आळेयो, उसकी बड़ाई करो!

हे याकूब के वंश, थम सारे उसकी महिमा करो,

हे इस्राएल के वंश, थम उसका भय मान्‍नो!

24 क्यूँके उसनै दुखियाँ ताहीं तुच्छ न्ही जाण्या,

अर ना उनतै घृणा करै सै,

यहोवा नै उसतै अपणा मुँह कोन्या ल्हकोया,

पर जिब उसनै उसकी दुहाई दी, फेर उसकी सुणली।

25 बड़ी सभा म्ह मेरा तेरी बड़ाई करणा तेरी ए ओड़ तै हो सै;

मै अपणी मन्‍नतां नै जो उसका भय मान्‍नै सै उनकै स्याम्ही पूरा करुँगा।

26 नम्र लोग रोट्टी खाकै सन्‍तुष्‍ट होवैंगे;

जो यहोवा नै टोह्ण आळे सै, वे उसकी बड़ाई करैंगे।

उनके* मन सदा जिन्दा रहवै!

27 धरती के सारे दूर-दूर के देशां के माणस उसनै याद करैंगे

अर उसकी ओड़ बोहड़ैंगे;

अर जात्ति-जात्ति के सारे कुल तेरे स्याम्ही सिर झुकावैंगे।

28 क्यूँके राज्य यहोवा का ए सै,

अर सब जात्तां पै वोए राज करै सै।

29 धरती के सारे घमण्डी* माणस भोज* खाकै सिर झुकावैंगे;

वे सारे जितने माट्टी म्ह मिल जावै सै

अर अपणी जान न्ही बचा सकदे,

वे सारे उस्से कै स्याम्ही घुटने टेक्‍कैंगे।

30 एक वंश उसकी सेवा करैगा;

दुसरी पीढ़ी तै प्रभु का जिक्र करया जावैगा।

31 वे आवैंगे अर उसके धार्मिकता के काम्मां नै एक

वंश पै जो पैदा होवैगा, या कहकै जाहिर

करैंगे के उसनै इसे-इसे अदभुत काम करे।