बिलाप अर प्रार्थना
दाऊद की प्रार्थना
1 हे यहोवा कान लगाकै मेरी सुण ले,
क्यूँके मै दीन अर दरिद्र सूं।
2 मेरी जान की हिफाजत कर, क्यूँके मै भक्त सूं;
तू मेरा परमेसवर सै, इस करकै अपणे दास का,
जिसका भरोस्सा तेरे पै सै, उद्धार कर।
3 हे प्रभु, मेरे पै अनुग्रह कर,
क्यूँके मै तन्नै ए लगातार पुकारदा रहूँ सूं।
4 अपणे दास के मन नै आनन्दित कर,
क्यूँके हे प्रभु, मै अपणा मन तेरी ए ओड़ लगाऊ सूं।
5 क्यूँके हे प्रभु, तू भला अर माफ करण आळा सै,
अर जितने तेरे ताहीं पुकारै सै उन सारया खात्तर तू अति करुणामय सै।
6 हे यहोवा मेरी प्रार्थना की ओड़ कान लगा,
अर मेरे गिड़गिड़ाणे नै ध्यान तै सुण।
7 मुसीबत कै दिन मै तन्नै पुकारूँगा,
क्यूँके तू मेरी सुण लेगा।
8 हे प्रभु, देवत्यां म्ह तै कोए भी तेरै बरगा न्ही,
अर ना किसी के काम तेरे काम्मां कै बराबर सै।
9 हे प्रभु जितनी जातियाँ ताहीं तन्नै बणाया सै,
सारी आकै तेरे स्याम्ही झुकैंगी
अर तेरे नाम की महिमा करैगी।
10 क्यूँके तू महान अर बड़े-बड़े काम करण आळा सै,
सिर्फ तू ए परमेसवर सै।
11 हे यहोवा अपणा राह मन्नै दिखा, फेर मै तेरे सच्चे राह पै चाल्लूँगा,
मेरे ताहीं एक चित्त कर ताके मै तेरे नाम का भय मान्नु।
12 हे प्रभु, हे मेरे परमेसवर, मै अपणे पूरे मन तै तेरा धन्यवाद करुँगा,
अर तेरे नाम की महिमा सदा करदा रहूँगा।
13 क्यूँके तेरी करुणा मेरे उप्पर बड़ी सै;
अर तन्नै मेरे ताहीं अधोलोक की तह म्ह जाण तै बचा लिया सै।
14 हे परमेसवर, अभिमानी लोग मेरे खिलाफ उठे सै,
अर उपद्रवियाँ का झुण्ड मेरी जान का खोज्जी होया सै,
अर वे तेरे बारै म्ह कुछ न्ही सोचदे।
15 पर प्रभु दयालु अर अनुग्रहकारी परमेसवर सै,
तू देर तै छो करण आळा अर अति करुणामय सै।
16 मेरी और मुड़कै मेरे पै दया कर;
अपणे दास नै तू शक्ति दे,
अर अपणी दास्सी के बेट्टे का उद्धार कर।
17 मन्नै भलाई की कोए निशान्नी दिखा,
जिसनै देखकै मेरे बैरी निराश हों,
क्यूँके हे यहोवा तन्नै आप मेरी मदद करी
अर मेरे ताहीं शान्ति दी सै।