1 मै पूरे मन तै तेरा धन्यवाद करुँगा;

देवत्यां कै स्याम्ही मै तेरा भजन गाऊँगा।

2 मै तेरे पवित्र मन्दर की ओड़ झुककै दण्डवत करुँगा,

अर तेरी करुणा अर सच्‍चाई कै कारण तेरे नाम का धन्यवाद करुँगा;

क्यूँके तन्‍नै अपणे वचन ताहीं, अपणे नाम अर हुकम तै सबतै ऊँच्‍चा करया सै।*

3 जिस दिन मन्‍नै पुकारया, उसे दिन तन्‍नै मेरी सुण ली,

अर तन्‍नै ताकत देकै मेरी हिम्मत बन्‍धाई।

4 हे यहोवा, धरती के सारे राजा तेरा धन्यवाद करैगें,

क्यूँके उननै तेरे वचन सुणे सै;

5 अर वो यहोवा की चाल कै बारै म्ह गावैगें,

क्यूँके यहोवा की महिमा बड़ी सै।

6 यहोवा महान सै, फेर भी वो नरम माणसां की ओड़ निगांह करै सै;

पर घमण्डी नै दूर तै ए पिच्छाणै सै।

7 चाहे मै मुसीबत कै बीच म्ह चाल्‍लूँ, फेर भी तू मन्‍नै सही-सलामत राक्खैगा*,

तू मेरे छो तै भरे होये दुश्मनां कै खिलाफ हाथ बढ़ावैगा,

अर अपणे सोळे हाथ तै मेरा उद्धार करैगा।

8 यहोवा मेरै खात्तर सब कुछ पूरा करैगा;

हे यहोवा तेरी करुणा सदा की सै।

तू अपणे हाथ्थां के काम्मां नै ना छोड़।