1 परमेसवर जो म्हारा बल सै, उसका गीत खुशी तै गाओ;

याकूब के परमेसवर की जयजयकार करो!

2 गीत गाओ, डफ अर मधुर बाज्जण आळी वीणा अर सारंगी नै ले आओ।

3 नये चाँद के दिन,

अर पूर्णमासी नै म्हारे त्यौहार कै दिन नरसिंगा फूँको।

4 क्यूँके या इस्राएल खात्तर विधि,

अर याकूब के परमेसवर का ठहराया होया नियम सै।

5 इस ताहीं उसनै यूसुफ खात्तर चितौनी की रीति पै उस बखत चलाया,

जिब वो मिस्र देश कै खिलाफ चाल्या।

ओड़ै मन्‍नै एक अनजाणी भाषा सुणी;

6 "मन्‍नै उनके कान्धयां पै तै बोझ तार दिया;

उनका टोकरी ढोणा छूट ग्या।

7 तन्‍नै मुसीबत म्ह पड़कै पुकारया, फेर मन्‍नै तेरे ताहीं छुड़ाया;

बादळ गरजण की गुप्त जगहां म्ह तै मन्‍नै तेरी सुणी,

अर मरीबा नाम के चोवै कै धोरै तेरा इम्तिहान लिया। (सेला)

8 हे मेरी प्रजा, सुण, मै तेरे ताहीं चेतावनी दियुँ सूं!

हे इस्राएल भला हो के तू मेरी सुणै!

9 तेरै बीच म्ह कोए पराया ईश्‍वर ना हो;

अर ना तू किसे पराए देवता नै दण्डवत करिये!

10 तेरा परमेसवर यहोवा मै सूं,

जो थमनै मिस्र देश तै लिकाड़ ल्याया सूं।

तू अपणा मुँह खोल, मै उसनै भर दियुँगा।

11 पर मेरी प्रजा नै मेरी न्ही सुणी;

इस्राएल नै मेरे ताहीं न्ही चाह्या।

12 इस करकै मन्‍नै उन ताहीं उनके मन के हठ पै छोड़ दिया,

ताके वो अपणी ए योजना कै मुताबिक चाल्‍लै।

13 जै मेरी प्रजा मेरी सुणै,

जै इस्राएल मेरे राह पै चाल्‍लै,

14 तो मै पलभर म्ह थारे दुश्मनां नै दबाऊँ,

अर अपणा हाथ थारे बैरियाँ कै खिलाफ चलाऊँ।

15 यहोवा के बैरी तो यहोवा के भय म्ह उसनै दण्डवत करै,

उन ताहीं हमेशा खात्तर शर्मिन्दा करया जावैगा।

16 पर मै थमनै उनतै आच्छी तै आच्छी गेहूँ खुवान्दा,

अर मै चट्टान के शहद तै थमनै छिकान्दा।"