संकट कै बखत म्ह तसल्ली
प्रधान बजाण आळे खात्तर: यदूतून की राग पै, आसाप का भजन
1 मै परमेसवर की दुहाई चिल्ला-चिल्लाकै दियुँगा,
मै परमेसवर की दोहाई दियुँगा, अर वो मेरी और कान लगावैगा।
2 मुसीबत के दिन म्ह प्रभु की खोज म्ह लाग्या रहया;
रात नै मेरा हाथ फैल्या रहया, अर ढील्ला ना होया,
मेरे म्ह शान्ति आई ए कोनी।
3 मै परमेसवर नै याद कर-करकै कहराऊ सूं;
मै चिन्ता करदे-करदे बेसुध हो चल्या सूं। (सेला)
4 तू मन्नै झपकी भी लेण न्ही देन्दा;
मै इसा घबराया सूं के मेरे मुँह तै बात न्ही लिकड़दी।
5 मन्नै पुराणे बखत के दिनां म्ह,
अर युग-युग के साल्लां कै बारै म्ह सोच्या सै।
6 मै रात कै बखत अपणे गीत नै याद करदा;
अर मन म्ह ध्यान करुँ सूं,77:6 मै रात नै अपणी आत्मा म्ह बात करुँ सूं, अर ध्यान करुँ सूं अर भलाई नै मन म्ह टोह्ऊ सूं,
अर मन म्ह आच्छी तरियां विचार करुँ सूं;
7 "के मन्नै प्रभु युग-युग खात्तर छोड़ देवैगा;
अर फेर कदे खुश न्ही होवैगा?
8 के उसकी करुणा हमेशा खात्तर जान्दी रही?
के उसका वचन पीढ़ी-पीढ़ी खात्तर नाकामयाब होग्या?
9 के परमेसवर अनुग्रह करणा भूल ग्या?
के उसनै छो करकै अपणी सारी दया ताहीं रोक राख्या सै?" (सेला)
10 मन्नै कह्या, "योए तो मेरा दुख सै, के परमप्रधान का सोळा हाथ बदल ग्या सै।"
11 मै यहोवा के बड़े काम्मां की चर्चा करुँगा;
जरुर मै तेरे पुराणे बखत आळे अदभुत काम्मां नै याद करुँगा।
12 मै तेरे सारे काम्मां पै ध्यान करुँगा,
अर तेरे बड़े काम्मां कै बारै म्ह सोच्चूँगा।
13 हे परमेसवर तेरी चाल पवित्रता की सै।
कौण सा देवता परमेसवर कै बराबर बड़ा सै?
14 अदभुत काम करण आळा परमेसवर तू ए सै,
तन्नै देश-देश के माणसां पै अपणी शक्ति जाहिर करी सै।
15 तन्नै अपणे भुजबल तै अपणी प्रजा,
याकूब अर यूसुफ के वंश ताहीं छुड़ा लिया सै। (सेला)
16 हे परमेसवर जद समुन्दर नै तेरे ताहीं देख्या,
तो समुन्दर तन्नै देखकै डरग्या,
गहरा सागर भी काँप ग्या।
17 बादळां तै बड़ी बारिस होई;
अकास तै शब्द होया;
फेर तेरे तीर आस्सै-पास्सै चाल्ले।
18 बवण्डर म्ह तेरे गरजण का शब्द सुणै था;
दुनिया बिजळी तै प्रकाशित होई;
धरती काँप अर थरथरागी।
19 तेरा राह समुन्दर म्ह सै,
अर तेरा रास्ता गहरे पाणी म्ह होया;
अर तेरे पैरां की कोए पैड भी न्ही दिखदी।
20 तन्नै मूसा अर हारुन के जरिये,
अपणी प्रजा की अगुवाई भेड़ की तरियां करी।