1 हे मेरे माणसों, मेरी शिक्षा सुणो;

मेरे वचनां की ओड़ कान लगाओ!

2 मै अपणा मुँह ज्ञान की बात कहण खात्तर खोल्‍लूँगा;

मै पुराणे बखत की गुप्त बात कहूँगा,

3 जिन बात्तां ताहीं हमनै सुण्या,

अर जाण लिया, अर म्हारे पूर्वजां नै म्हारे तै जिक्र करया सै।

4 उननै हम उनकी औलाद तै लह्को के न्ही राक्खागें,

पर आण आळी पीढ़ी के माणसां तै,

यहोवा का गुणगान अर उसकी सामर्थ्य

अर बड़े-बड़े काम्मां का जिक्र करागें।

5 उसनै तो याकूब म्ह एक चितौनी ठहराई,

अर इस्राएल म्ह नियम-कायदा चलाया,

जिसके बाबत उसनै म्हारे बाप-दाद्यां ताहीं हुक्म दिया,

के थम इननै अपणे-अपणे बाळ-बच्‍चां ताहीं बताइयो;

6 के आण आळी पीढ़ी के लोग, मतलब जो बाळक पैदा होण आळे सै, वो इननै जाणै;

अर अपणे-अपणे बाळ-बच्‍चां ताहीं इनका जिक्र करण म्ह इच्छुक हों,

7 जिसतै वे परमेसवर पै भरोस्सा राक्खै, परमेसवर के बड़े काम्मां नै भूल ना जावै,

पर उसके हुकमां नै मानते रहवै;

8 अर अपणे बाप-दाद्यां की तरियां ना हो,

क्यूँके उस पीढ़ी के लोग तो ढ़ीठ अर झगड़ालू थे,

अर उननै अपणा मन मजबूत न्ही करया था,

अर ना उनकी आत्मा परमेसवर की ओड़ साच्‍ची रही।

9 एप्रैमियां नै तो शस्‍त्रधारी अर धनुर्धारी होण पै भी,

लड़ाई के बखत पीठ दिखा दी।

10 उननै परमेसवर के करार का पालन न्ही करया,

अर उसके नियम-कायदा पै चाल्‍लण तै इनकार करया।

11 उननै उसके बड़े काम्मां ताहीं अर जो चिन्ह अर चमत्कार उसनै उनके स्याम्ही करे थे,

उन ताहीं भूला दिया।

12 उसनै तो उनके बाप-दाद्यां के स्याम्ही मिस्र देश के सोअन के मैदान म्ह अदभुत काम करे थे।

13 उसनै समुन्दर ताहीं दो भाग करकै उनतै पार करा दिया,

अर पाणी ताहीं ढ़ेर की तरियां खड्या कर दिया।

14 अर उसनै दिन म्ह बादळ के खम्‍भयां तै

अर रात भर आग की रोशनी के जरिये उनकी अगुवाई करी।

15 वो जंगळ म्ह चट्टान पाड़कै,

उन ताहीं मान्‍नो गहरे जलाशयों म्ह तै मन मान्या पियाया करै था।

16 उसनै चट्टान म्ह तै भी धारा लिकाड़ी

अर नदियाँ की तरियां पाणी बहाया।

17 तोभी वे फेर उसके खिलाफ घणे पाप करदे गए,

अर निर्जल देश म्ह परमप्रधान के खिलाफ उठदे रह्ये।

18 अर अपणी मर्जी के मुताबिक खाणा माँगकै मन ए मन म्ह परमेसवर का इम्तिहान लिया।

19 वे परमेसवर के खिलाफ बोल्‍ले,

अर कहण लाग्गे, "के परमेसवर जंगळ म्ह मेज लगा सकै सै के?

20 उसनै चट्टान पै मारकै पाणी बहा तो दिया,

अर धाराएँ उमड़ चली,

पर के वो रोट्टी भी दे सकै सै?

के वो अपणी प्रजा खात्तर माँस भी तैयार कर सकै सै?"

21 यहोवा सुणकै छो तै भरग्या,

फेर याकूब के खिलाफ उसकी आग भड़क उठ्ठी,

अर इस्राएल कै खिलाफ छो भड़क्या;

22 इस करकै उननै परमेसवर पै बिश्वास न्ही राख्या था,

ना उसकी उद्धार करण की शक्ति पै भरोस्सा करया।

23 तोभी उसनै अकास ताहीं हुकम दिया,

अर सुर्ग के दरवाज्यां ताहीं खोल्या;

24 अर उनकै खात्तर खाण नै मन्‍ना बरसाया,

अर उन ताहीं सुर्ग का अन्‍न दिया।

25 इन्सानां ताहीं सुर्गदूत्तां की रोट्टी मिली;

उसनै उन ताहीं मन चाह्या भोजन दिया।

26 उसनै अकास म्ह पूर्वी हवा चलाई,

अर अपणी शक्ति तै दक्षिणी हवा बहाई;

27 अर उनकै खात्तर माँस धूळ की तरियां भोत बरसाया,

अर समुन्दर के रेत की तरियां अनगिणत पंछी भेजे:

28 अर उनके डेरां कै बीच म्ह,

उसके घरां के च्यांरु ओड़ गिराए।

29 अर वे खाकै पूरी तरियां तै छिकगे,

अर उसनै उनकी कामना पूरी करी।

30 उनकी कामना बणी ए रही,

उनका खाणा उनके मुँह ए म्ह था,

31 के परमेसवर का छो उनपै भड़क्या,

अर उसनै उनके हट्टा-कट्यां ताहीं मार गेरया,

अर इस्राएल के जवान्‍नां ताहीं गिरा दिया।

32 इतणा होण पै भी वे और घणे पाप करदे गए;

अर परमेसवर के बड़े-बड़े काम्मां का बिश्वास न्ही करया।

33 फेर उसनै उनके जीवन के दिनां ताहीं बेकार की मेहनत म्ह,

अर उनके साल ताहीं घबराहट म्ह कटवाया।

34 जिब वो उन ताहीं घात करण लाग्गै, फेर वे उस ताहीं पूच्छै थे;

अर दोबारा परमेसवर नै यतन तै टोहवै थे।

35 अर उन ताहीं याद आया करै था के परमेसवर म्हारी चट्टान सै,

अर परमप्रधान परमेसवर म्हारा छुड़ाण आळा सै।

36 फेर भी उननै उसकी चापलूसी करी;

वे उसतै झूठ बोल्‍ले।

37 क्यूँके उनका दिल उसकी ओड़ तै मजबूत ना था;

ना वे उसकै करार के बारै म्ह सच्‍चे थे।

38 पर वो दयालु सै, वो अधर्म नै ढकै सै, अर नाश न्ही करदा;

वो बार-बार अपणे छो नै ठण्डा करै सै,

अर अपणी जळजळाहट नै पूरी रीति तै भड़कण न्ही देन्दा।

39 उसनै याद आया के ये नाशवान सै,

ये हवा की तरियां सै जो चली जावै सै अर उलटी न्ही आन्दी।

40 उननै कितनी ए बार जंगळ म्ह उसका बिरोध करया,

अर बियाबान देश म्ह उस ताहीं उदास करया!

41 वे बार-बार परमेसवर का इम्तिहान करदे रहे,

अर इस्राएल के पवित्र परमेसवर नै दुखी करदे रहे।

42 उननै ना तो उसकी ताकत ताहीं याद करया,

ना वो दिन जब उसनै उन ताहीं विरोधियों के बस म्ह तै छुड़ाया था;

43 के उसनै किस तरियां के काम मिस्र देश म्ह,

अर अपणे चमत्कार सोअन के मैदान म्ह करे थे।

44 उसनै तो मिस्रियाँ की नदियाँ का पाणी खून बणा दिया,

अर वे अपणी नदियाँ का पाणी पी भी न्ही सके।

45 उसनै उनके बीच म्ह डांस भेज्जे जिन नै उन ताहीं काट खाया,

अर मिंढ़क भी भेज्जे, जिन नै उन ताहीं बिगाड़ किया।

46 उसनै उनकी धरती की उपज कीड़ियाँ ताहीं,

अर उनकी खेत्तीबाड़ी टिड्डियाँ ताहीं खुआ दी थी।

47 उसनै उनकी अंगूर की बेल ताहीं ओळयां तै,

अर उनके गूलर के दरखतां ताहीं बड़े-बड़े ओळे बरसा कै नाश करया।

48 उसनै उनके पशुआं ताहीं ओळयां तै,

अर उनके ढोरां ताहीं बिजळियाँ तै मिटा दिया।

49 उसनै उनके उप्पर अपणा खतरनाक छो अर रोष भड़काया,

अर उन ताहीं मुसीबत म्ह गेरया,

अर दुखदाई दूत्तां का दल भेज्या।

50 उसनै अपणे छो का राह खोल्या,

अर उनके प्राण ताहीं मौत तै ना बचाया,

पर उन ताहीं मरी के बस म्ह कर दिया।

51 उसनै मिस्र के सारे जेठ्यां ताहीं मारया,

जो हाम के डेरां* म्ह माणस के पैहले फळ थे;

52 पर अपणी प्रजा तै भेड़-बकरियाँ की तरियां चलाये,

अर जंगळ म्ह उनकी अगुवाई पशुआं के झुण्ड की तरियां करी।

53 फेर वे उसके चलाण तै बेधड़क चाल्‍ले अर उननै किमे डर ना होया,

पर उनके दुश्मन समुन्दर म्ह डूबगे।

54 अर उसनै उन ताहीं अपणे पवित्र देश की हद तक,

इसे पहाड़ी देश म्ह पोहचाया, जो उसनै अपणे सोळे हाथ तै मिल्या था।

55 उसनै उनके स्याम्ही तै गैरजात्तां ताहीं भजा दिया;

अर उनकी धरती नै डोरी तै नाप-नाप कै बाँट दिया;

अर इस्राएल के गोत्रां ताहीं उनके डेरां म्ह बसाया।

56 फेर भी परमप्रधान परमेसवर का इम्तिहान लिया अर उसतै बिद्रोह करया,

अर उसकी चितौनियाँ नै ना मान्या,

57 अर मुड़कै अपणे बुजुर्गां की तरियां बिश्वासघात करया;

उननै निकम्मे धनुष की तरियां धोखा दिया।

58 क्यूँके उननै आराधना की ऊँच्‍ची जगहां* बणाकै उस ताहीं छो दुवाया,

अर बणाई होए मूर्तियाँ के जरिये उस म्ह जळण उपजाई।

59 परमेसवर सुणकै छो तै भरग्या,

अर उसनै इस्राएल ताहीं जमाए छोड़ दिया।

60 उसनै शीलो* के निवास,

मतलब उस तम्‍बु ताहीं जो उसनै माणसां के बीच खड्या करया था, छोड़ दिया,

61 अर करार के सन्दूक* ताहीं गुलाम्मी म्ह जाण दिया,

अर अपणी शोभा ताहीं बिरोधियाँ के बस म्ह कर दिया।

62 उसनै अपणी प्रजा ताहीं तलवार तै मरवा दिया,

अर अपणे खास माणसां पै छो तै भरग्या।

63 उनके जवान आग तै भस्‍म होए,

अर उनकी कुमारियाँ के ब्याह के गीत न्ही गाये गये।

64 उनके याजक तलवार तै मारे गए,

अर उनकी बिधवा रोण न्ही पाई।

65 फेर प्रभु मान्‍नो नींद तै चौंक कै उठ्या,

अर इसे वीर की तरियां उठ्या जो दाखमधु पी कै ललकारदा हो।

66 अर उसनै अपणे दुश्मनां ताहीं मारकै पाच्छै हटा दिया;

अर उनकी सदा की बदनामी कराई।

67 फेर उसनै यूसुफ के तम्‍बु* ताहीं छोड़ दिया;

अर एप्रैम के गोत्र ताहीं ना चुण्या;

68 पर यहूदा ए के गोत्र ताहीं,

अर अपणे प्यारे सिय्योन पहाड़ ताहीं चुण लिया।

69 उसनै अपणे पवित्र जगहां ताहीं भोत ऊँच्‍चा बणा दिया,

अर धरती की तरियां मजबूत बणाया, जिसकी नींव उसनै सदा खात्तर डाली सै।

70 फिर उसनै अपणे दास दाऊद ताहीं चुण कै भेड्डां के बाड़े म्ह तै ले लिया;

71 वो उसनै बच्‍चयां आळी भेड्डां कै पाच्छै-पाच्छै फिरण तै ले आया

के वो उसकी प्रजा याकूब की मतलब उसके खास भाग इस्राएल की चरवाही करै।

72 फेर उसनै खरे मन तै उनकी चरवाही करी,

अर अपणे हाथ की कुशलता तै उनकी अगुवाई करी।