दुश्मनां कै बिरुध्द प्रार्थना गीत
आसाप का भजन
1 हे परमेसवर चुप ना रह;
हे परमेसवर चुप ना रह, अर ना शांत रह!
2 क्यूँके देख तेरे दुश्मन धूम मचारे सै;
अर तेरे बैरियाँ नै सिर ठाया सै।
3 वे चालाकी तै तेरी प्रजा के नुकसान की सलाह करै सै,
अर तेरे बचाये होए माणसां कै खिलाफ योजना लिकाड़ै सै।
4 उननै कह्या, "आओ, हम उनका इसा नाश करां के राज्य भी मिट जावै;
अर इस्राएल का नाम आग्गै तै याद ना रहवै।"
5 उननै एक मन हो कै योजना बणाई सै,
अर तेरैए खिलाफ करार करया सै।
6 ये तो एदोम के तम्बू आळे
अर इश्माएली, मोआबी अर हग्री,
7 गबाली, अम्मोनी, अमालेकी,
अर सोर समेत पलिश्ती सै।
8 इनकै गैल अश्शूरी भी मिलगे सै;
उनतै भी लूतवंशियां नै सहारा मिल्या सै। (सेला)
9 इनतै इसा कर जिसा मिद्यानियाँ तै,
अर कीशोन नदी म्ह सीसरा अर याबीन तै करया था,
10 जो एनदोर म्ह नाश होए,
अर धरती खात्तर खाद बणगे।
11 इनकै रईसां ताहीं ओरेब अर जएब सरीखे,
अर इनकै सारे प्रधानां नै जेबह अर सल्मुन्ना की तरियां करदे,
12 जिन नै कह्या था,
"हम परमेसवर की चराईयाँ के अधिकारी खुदे हो जावागें।"
13 हे मेरे परमेसवर इननै बमबुळिया की धूळ,
या हवा तै उड़ाए होए तुड़ी की तरियां करदे।
14 उस आग की तरियां जो बण नै भस्म करै सै,
अर उस लौ की ढाळ जो पहाड़ां नै जळा देवै सै,
15 तू इननै अपणी आँधी तै भजा दे,
अर अपणे बमबुळिया तै घबरा दे!
16 इनकै मुँह नै शर्मिन्दगी तै नीच्चा कर,
के हे यहोवा ये तेरे नाम नै टोह्वै।
17 ये सदा खात्तर शर्मिन्दा अर घबराए रहवैं
इनकै मुँह काळे हों, अर इनका नाश हो जावै,
18 जिसतै ये जाणै के सिर्फ तू जिसका नाम यहोवा सै,
सारी धरती कै उप्पर परमप्रधान सै।