1 यहोवा की स्तुति करो।

हे मेरे मन यहोवा की स्तुति कर!

2 मै सारी उम्र यहोवा की स्तुति करदा रहूँगा;

जिब तक मै जिन्दा रहूँगा, तब तक अपणे परमेसवर का गीत गान्दा रहूँगा।

3 थम प्रधानां पै भरोस्सा ना राखियो,

ना किसे आदमी पै, क्यूँके उस म्ह उद्धार करण की ताकत्त कोन्या।

4 क्यूँके उसकी भी जान लिकड़ैगी, वो भी माट्टी म्ह मिल जावैगा;

उसे दिन उसकी सारी योजना नाश हो जावैगी।

5 कितनी भली बात सै,

जिसकी मदद करण आळा याकूब का परमेसवर सै,

अर जिसकी आस अपणे परमेसवर यहोवा पै सै।

6 वो अकास अर धरती अर समुन्दर

अर जो किमे उस म्ह सै, सब का बणाण आळा सै;

वो अपणा शब्द हमेशा खात्तर पूरा करदा रहवैगा।

7 वो जिनपै जुल्म होया सै उनका न्याय चुकावै सै;

अर भूखे नै रोट्टी देवै सै।

यहोवा कैदियाँ नै छुड़ावै सै;

8 यहोवा आन्धयां नै आँख देवै सै।

यहोवा झुके होया नै सीध्धा खड्या करै सै;

यहोवा धर्मियाँ तै प्यार करै सै।

9 यहोवा परदेशियाँ की सम्भाल करै सै;

अर अनाथ्थां अर बिधवा की वो देखभाळ करै सै;

पर दुष्टां की राह नै टेढ़ा-मेढ़ा कर देवै सै।

10 हे सिय्योन, यहोवा हमेशा खात्तर,

तेरा परमेसवर पीढ़ी-पीढ़ी राज करदा रहवैगा।

यहोवा की स्तुति करो!